उपेन्द्र यादव बन्ने भए स्वास्थ्यमन्त्री

हेल्थ टुडे,
काठमाडौं, २४ फागुन : स्वास्थ्य तथा जनसंख्या मन्त्रालयको जिम्मेवारी जनता समाजवादी पार्टी (जसपा) का अध्यक्ष उपेन्द्र यादवले पाउने भएका छन् । जसपाले पार्टी अध्यक्ष यादवको नेतृत्वमा सरकारमा जाने निर्णय गरे पछि यादव स्वास्थ्य मन्त्री बन्ने पक्का भएको हो । यादवले यस भन्दा अगाडि पनि स्वास्थ्य तथा जनसंख्या मन्त्रालयको नेतृत्व सम्हालिसकेका छन् ।
प्रधानमन्त्री पुष्पकमल दाहाल प्रचण्डले बनाएको नयाँ गठबन्धनमा जसपा सहभागी भए पनि बुधबार मन्त्रिपरिषद् विस्तार गर्दा जसपाले मन्त्री पठाएको थिएन । जसपाका सांसद प्रदीप यादवले जसपाबाट पार्टी अध्यक्ष यादवले उपप्रधान तथा स्वास्थ्यमन्त्रीको जिम्मेवारी सम्हाल्ने निर्णय भएको जानकारी दिए । नेकपा एमालेले स्वास्थ्य मन्त्रीमा पदम गिरीलाई बनाउने योजना सहित शपथ ग्रहण समेत गराएको थियो । पछि प्रधानमन्त्री दाहालले स्वास्थ्य मन्त्री जसपालाई दिनुपर्ने भन्दै गिरीलाई कानुन मन्त्रीको जिम्मेवारी दिएका थिए । नयाँ गठबन्धनमा जसपाले दुई वटा मन्त्रालय पाउने दलहरुबिच सहमती भइसकेको छ ।