पदमराज जोशी,
काठमाडौं, १३ चैत : नेपाल नेत्रज्योति संघ मार्फत सञ्चालित आँखा अस्पतालहरु र आँखा उपचार केन्द्रहरुमा उपचारका लागि आउने विदेशीहरुको संख्या उल्लेख्य रुपमा बढ्दै गइरहेको पाइएको छ । सन् २०२३ मा नेत्रज्योति संघ मातहत सञ्चालनमा रहेका अस्पताल र आँखा उपचार केन्द्रहरुमा कुल ३३ लाख ६ हजार विरामीको आँखा जाच र उपचार गराएको थियो । त्यसमध्ये ८ लाख ५ हजार विदेशी नागरिक रहेको नेपाल नेत्रज्योति संघका महासचिव भरतबहादुर चन्दले जानकारी दिए । आँखा उपचारका लागि नेपाल आउने अधिकांश विरामी भारतको सिमावर्ती क्षेत्रका रहेका छन् ।
महासचिव चन्दका अनुसार पछिल्ला वर्षमा आँखा उपचारका लागि छिमेकी देश बंगालादेशबाट समेत नेपाल आउने विरामीको संख्या बढदै गइरहेको छ । चन्दले भने, ‘ गत वर्ष मात्र चार हजार बंगालादेशीले नेत्रज्योति संघ मातहत सञ्चालित अस्पतालमा आँखाको उपचार गराएको तथ्यांक छ । यो संख्या बर्षेनी बढ्दो छ । ’ नेपाल नेत्रज्योति संघ मातहत देशभरि २८ वटा आँखा अस्पताल, १५६ वटा आँखा उपचार केन्द्र र ४३ जिल्ला साखा रहेका छन् । नेपाल नेत्रज्योति संघका कार्यकारी निर्देशक डा.सैलेश मिश्रका अनुसार भारतका २९ प्राप्तहरुमध्ये ५ प्रान्त बाहेकका ठाउँबाट आँखाको उपचारका लागि भारतीयहरु नेपाल आउने गरेका छन् । भारतको सिमावर्ती क्षेत्रमा खोलिएका नेपालका आँखा अस्पतालहरुमा ठूलो संख्यामा भारतीय विरामीले उपचार सेवा पाइरहेका छन् । विराटनगर आँखा अस्पताल, सगरमाथा चौधरी आखा अस्पताल, भैरहवा आँखा अस्पताल, मेची आँखा अस्पताल र कैलालीको गेटा आँखा अस्पतालमा उपचार गराउने मध्ये ठूलो हिस्सा भारतीय हुने गरेको डा. मिश्र बताउछन् ।
आँखा उपचारका लागि विदेशी विरामीको संख्या बढ्दै गए पछि ती अस्पतालहरुलाई आत्मनिर्भर हुन सहयोग मिलेको छ । नेपाल नेत्रज्योति संघले सञ्चालन गरेका आँखा अस्पतालहरुले न्युतमत शुल्कमा गुणस्तरीय उपचार सेवा प्रदान गर्दै आइरहेकाले विदेशीको रोजाई पनि नेपालका आँखा अस्पताल हुने गरेको डा. मिश्रको दावी छ । नेत्रज्योति संघले पछिल्ला दिनमा आँखा सेवालाई देशभित्रमात्र सिमित नराखेर नेपालीको संख्या बढी भएका खाडी देशहरुमा पनि स्वास्थ्य सिविरको माध्यमबाट पुर्याउने प्रयास गरिरहेको छ । संघले बंगालादेश, थाइल्यान्ड, म्यान्मार लगायतका देशमा आँखा सिविर आयोजना गरेर कामका लागि विदेशमा रहेका नेपालीहरुलाई उपचार सेवा प्रदान गरेको छ । संघका महासचिव चन्दका अनुसार संघले केही दिनमै बहराइनमा आँखा स्वास्थ्य सिविर आयोजना गर्दै छ भने मलेसिया, कुवेत लगायतका देशमा सम्बन्धित देशमा रहेका नेपाली राजदुतावासको सहयोगमा सिविर आयोजना गर्ने योजना बनाएको छ ।
अन्य रोगको उपचारका लागि नेपालीहरु विदेश जानु परिरहेका बेला आँखा उपचारका लागि विदेशीहरु समेत नेपाल आउनु नेपालको स्वास्थ्य पर्यटनका दृष्टिले समेत सकारात्मक रहेको नेपाल नेत्रज्योति संघका अध्यक्ष डा. चेतराज पन्त बताउछन् । नेत्रज्योति संघ मातहतका आँखा अस्पतालहरुले गुणस्तरीय सेवा प्रदान गरेकै परिणाम स्वरुप विदेशीहरु समेत उपचारका लागि आउने थालेको डा. पन्तको भनाई छ । आफुले आँखाको डाक्टर भएर नेपाल फर्कदा जम्मा ५ जना मात्र आँखा रोग विशेषज्ञ रहेकोमा अहिले त्यो संख्या बढेर आँखा रोग विज्ञको संख्या करिव ४ सय पुगुको डा. पन्तको दावी छ । आँखा उपचारको क्षेत्रमा अझै थुप्रै काम गर्न बाकी रहेको बताउदै डा. पन्तले आँखा रोग र उपचार सेवाका बिषयमा जनचेतना बिस्तार गर्दै प्रत्येक पालिकासम्म आँखा सेवा प्र्याउन्पर्ने अहिलेको प्रम्ख चुनौति रहेको र त्यो चुनौतिको सामना गर्न नेत्रज्योति संघ लागिपरेको डा. पन्त बताउछन् ।
नेत्रज्योति संघ मार्फत सञ्चालित आँखा अस्पतालमा उपचार गराउने विदेशीको संख्या बढ्दै
![नेत्रज्योति संघ मार्फत सञ्चालित आँखा अस्पतालमा उपचार गराउने विदेशीको संख्या बढ्दै](https://healthtodaynepal.com/wp-content/uploads/2024/03/netra-1624357831-940x593.jpg)
Leave a Reply