चैत २८ देखि हुने स्वास्थ्य वैज्ञानिकहरुको सम्मेलनको राष्ट्रपति रामचन्द्र पौडेलले उद्घाटन गर्ने

हेल्थ टुडे,
काठमाडौं, २६ चैत: नेपाल स्वास्थ्य अनुसन्धान परिषद्को आयोजनामा यही चैत २८ देखि ३० गतेसम्म काठमाडौंको बौद्धस्थित ह्यात रिसिडेन्सी होटेलमा आयोजना हुने १० औं स्वास्थ्य तथा जनसंख्या बैज्ञानिकहरुको शिखर सम्मेलनमा १००० अनुसन्धानकर्ता सहभागी हुने भएको छन् ।
‘दिगो विकासका लक्ष्यहरु प्राप्तिका लागि स्वास्थ्य र जनसंख्या सम्बन्धी अनुसन्धान र नवप्रवर्तन’ भन्ने नाराका साथ आयोजना हुन लागेको शिखर सम्मेलनमा देश र विदेशबाट गरि १००० अनुसन्धानकर्ता सहभागी हुने र सम्मेलनको उद्घाटन सम्माननीय राष्ट्रपति रामचन्द्र पौडेलले गर्ने कार्यक्रम तय भएको नेपाल स्वास्थ्य अनुसन्धान परिषद्का कार्यकारी सदस्य सचिव डा. प्रमोद जोशीले जानकारी दिए । सम्मेलनमा नेपाल बाहृेक भारत, स्वीजरल्याण्ड, बेलायत, अष्टेलिया, अमेरिका लगायतका देशहरुबाट स्वास्थ्य अनुसन्धानकर्ता सहभागी हुने छन् । सोमबार परिषदमा आयोजना गरिएको पत्रकार सम्मेलनमा सदस्य सचिव डा. जोशीले स्वास्थ्य सम्बन्धी नीति र अभ्यासलाई मूर्तरुप दिन अनुसन्धानलाई प्रभावकारी रुपमा नीति र योजनामा सहमावेश गराउन यस्ता सम्मेलनहरुले ठूलो भूमिका खेल्ने बताए ।
डा. जोशीले भने,‘ सम्मेलनले स्वास्थ्य र जनसंख्याका क्षेत्रमा हुने अनुसन्धानको विकास गर्न र स्वास्थ्यका प्राथमिकताहरुमा छलफल गर्न अनुसन्धानकर्ता, साझेदार, शिक्षाविद्हरु र नीतिनिर्माताहरुलाई एउटै मञ्चमा ल्याउने छ । ’ डा.जोशीका अनुसार सम्मेलनमा ७५ वटा अनुसन्धानमूलक पेपरहरुको मौखिक तथा २६३ वटा पोष्टरहरुको प्रस्तुतीकरण हुने छ ।
नेपाल स्वास्थ्य अनुसन्धान परिषद्का वरिष्ठ अनुसन्धान अधिकृत डा. मेघनाथ धिमालले नेपालको वित्तिय स्वास्थ्य, प्रमाणमा आधारित औषधि र चिकित्सा अभ्यास, प्रभावकारी र उत्तरदायी स्वास्थ्य प्रणाली, गुणस्तरीय स्वास्थ्य सेवा, वातावरणीय स्वास्थ्य र जलवायु परिवर्तन, सर्ने र नसर्ने रोगहरु र मानसिक स्वास्थ्य लगायत १५ वटा भन्दा बढी बिषयमा सामूहिक छलफल हुने जानकारी दिए । सम्मेलनमा उत्कृष्ठ स्वास्थ्य अनुसन्धानकर्ताहरुलाई विभिन्न १० विधामा अवार्ड प्रदान गरिने छ ।