दूरबिनका माध्यमबाट हुने सल्यक्रियालाई सहज बनाउनु पर्छ : पुर्व राष्ट्रपति भण्डारी

हेल्थ टुडे,
काठमाडौं, ५ जेठ : पुर्व राष्ट्रपति विद्यादेबी भण्डारीले दूरबिनबाट गर्ने उपचार विधि सहज र सुलभ बनाउनु पर्ने आवश्यकता रहेको बताएकी छन् । नेपाल सोसाइटी फर गाइनोलोजिक एन्डोस्कोपीको आयोजनामा शुक्रबार राजधानीमा सुरु भएको ‘नेपाली महिलाहरुका लागि विश्वव्यापी एण्डोस्कोपी सम्बन्धी पहिलो अन्तर्राष्ट्रिय सम्मेलन’ को उदघाटन समारोहमा बोल्दै पुर्व राष्ट्रपति भण्डारीले स्त्री रोग तथा प्रसूति रोगको निदानमा दूरविन प्रविधि प्रभावकारी भएकोले यसको पहूच ग्रामिण स्तरसम्म पुर्याउनु पर्ने बताएकी हुन । भण्डारीले भनिन, ‘दूरविनका माध्यमबाट गरिने शल्यक्रिया सुगममा मात्र नभएर दुर्गमका महिलासम्म पनि पुर्याउनु आवश्यक भइसकेको छ । ’
पुर्व राष्ट्रपति भण्डारीले नेपाली महिलामा बढीजसो स्तन क्यान्सर र पाठेघरको मुखको क्यान्सरको समस्या रहेको पाइएकोले रोगको उपचारसँगै रोग लाग्नै नदिने गरि चेतनामूलक कार्यक्रम पनि संगै अगाडि बढाउनु पर्नेमा जोड दिइन ।
प्रतिनिधि सभा सदस्य समेत रहेकी वरिष्ठ स्त्रीरोग विज्ञ प्रा. डा. चन्दा कार्कीले दूरबिनबाट शल्यक्रिया गर्दा समयको बचतका साथै गुणस्तरीय उपचार पनि हुने भएकाले यसको महत्व सबैतिर बढीरहेको बताइन । यो सेवालाई देशका विभिन्न भागसम्म पुर्याउनु पर्ने आवश्यकता औल्याउदै डा.कार्कीले सांसदका नाताले आफुले यसको प्रवर्धन र विकासमा सक्दो सहयोग गर्ने बताइन ।
नेपाल सोसाइटी फर गाइनोलोजिक एन्डोस्कोपीका अध्यक्ष प्रा. डा.गणेश दंगालले सम्मेलनमा नेपाल लगायत ७ वटा देशका १५५ जना विज्ञ चिकित्सकहरुको सहभागिता रहेको जानकारी दिए । यसका साथै काठमाडौं मोडेल हस्पिटलमा ल्याप्रोस्कोपिक वर्कसप र नेपाल नेशनल अस्पतालमा हिस्टेरोस्कोपी वर्कसप सञ्चालन भएको आयोजकले जानकारी दिएको छ । कार्यक्रममा वरिष्ठ स्त्री रोग विज्ञहरुलाई विभिन्न अवार्डबाट सम्मानित गरिएको थियो ।