गर्मी मौसममा कसरी गर्ने आँखाको सुरक्षा ?

हेल्थ टुडे,
काठमाडौँ, ९ चैत : आँखा निकै संवेदनशील अंगमध्ये पर्छ । धुलोधुवाँबाट हामीले आँखालाई कतिको जोगाइरहेका छौं ? अहिले गर्मी सुरु भइसकेको छ । हावा चल्ने मौसम भएकाले धुलोबाट पनि आँखालाई जोगाउनु जरुरी छ । धुलोका कणले आँखामा विभिन्न समस्या निम्त्याउन सक्छ ।
चर्को घाममा काम गर्दा कहिलेकाहीँ आँखा चिलाउने, पाक्नेजस्ता समस्या पनि देखा पर्छन् । धुलोका कणमा हुने भाइरस र ब्याक्टेरियाको संक्रमण बढ्दै गयो भने आँखा नदेख्ने समस्या पनि आउन सक्छ ।
गर्मीयाममा आँखा रातो हुने, चिलाउने, सुक्खा हुने जस्ता लक्षण देखिन सक्छन् । गर्मी मौसममा आँखालाई जोगाउन के गर्ने त ? नेत्ररोग विशेषज्ञ रबिना तिमल्सिनाले आँखा सुरक्षाका उपाय बताएकी छन् ।

सफा पानीले नियमित रुपमा बिहान र बेलुका आँखा सफा गर्ने
आँखामा गाजल लगाउनुभएको छ भने बेलुका धोएर सुत्ने
आँखामा जथाभाबी औषधिको प्रयोग नगर्ने
लामो समयसम्म स्क्रिन नहेर्ने । हेरे पनि एकचोटिमा बढीमा २० मिनेट २० सेकेन्डभन्दा बढी नहेर्ने । त्यो भन्दा धेरै समय हेर्नुपर्ने भए केहीबेर विश्राम लिने
आँखामा समस्या देखिएको खण्डमा मेडिकलमा गएर जथाभाबी औषधि किन्नेभन्दा चिकित्सकको परामर्श लिइहाल्ने
घाममा हिँड्दा ‘यूभी प्रोटेक्सन’ चस्मा लगाउने
मोबाइल वा ल्यापटप चलाउँदा ’ब्लु कट’ चस्मा प्रयोग गर्ने ।