एमबीबीएस र बिडिएसको सिट बढाउन सिफारिस

हेल्थ टुडे,
काठमाडौं, १५ बैसाख: चिकित्सा शिक्षा अन्तरगत स्नातक तह एमविविएस (व्याचलर अफ मेडिसिन एण्ड व्याचलर्स अफ सर्जरी) र विडिएस (व्याचरलर अफ डेन्टर सर्जरी ) को आउँदो वर्षबाट शुल्क र कोटा दुबै बढ्ने भएको छ ।
चिकित्सा शिक्षा आयोगको सोमबार बसेको बैठकले शिक्षा सचिव डा. दीपक काफ्लेको संयोजकत्वमा बनेको कार्यदलले दिएको सुझावको आधारमा एमबीबीएस, बीडीएसको सिट बढाउन सकिने बाटो खुला गरेको हो । प्रधानमन्त्री केपी शर्मा ओली मेडिकल कलेजहरुको सिट र शुल्क बढाउन सहमत भएपछि ‘ो सिट र शुल्क दुवै बढ्ने भएको हो ।
चिकित्सा शिक्षा ऐन, २०७५ को व्यवस्थाबमोजिम प्राविधिक समिति गठन गरी स्तर र मापदण्ड निर्धारणका अधारमा सिट संख्या र शुल्क पुनरावलोकनका लागि बाटो खुलेको हो ।
सोका लागि ऐनबमोजिम आयोगको योजना, समन्वय तथा प्राज्ञिक उन्नयन निर्देशनालयका प्रा डा सुजनबाबु मरहट्टाको संयोजकत्वमा प्राविधिक समिति गठन भएको छ । समितिमा विज्ञका तर्फबाट प्रा डा दिव्यासिंह शाह, वरिष्ठ चार्टर एकाउन्टेन्ट महेश गरागाईँ, निजी मेडिकल कलेजका तर्फबाट चार्टर एकाउन्टेन्ट सन्तोष खनाल, शिक्षा, स्वास्थ्य र अर्थ मन्त्रालयका उपसचिवहरु रहनेछन्।
आयोगमा सिटको निर्धारण गर्ने समितिलाई थप अध्ययनका लागि निर्देशन दिइएको स्वास्थ्यमन्त्री प्रदीप पौडेलले जानकारी दिए । समितिले दिएको प्रतिवेदनको आधारमा आयोगको पूर्ण बैठकले थप निर्णय गर्ने उनले बताए । ‘एमबीबीएस, बीडीएस अध्ययन गर्न चाहिने आवश्यक कुरा पुगेको अवस्थामा मात्रै सिट संख्या बढाउन सकिने निर्णय भएको छ,’ स्वास्थ्यमन्त्री पौडेलले भने, ‘कति सिट बढाउन सकिन्छ भन्नेबारे ठोस निर्णय भएको छैन ।’
स्वास्थ्यमन्त्री पौडेलका अनुसार अस्पतालको भौतिक पूर्वाधार, उपकरण बिरामी, शिक्षक आधारमा सिट संख्या थप गर्न सकिने छ ।
हाल निजी मेडिकलले एमबीबीएस पढाउन एक सय सिट पाइरहेका छन् । ‘मेडिकल कलेजको क्षमता अनुसार एक सय बाट थप सिट बढाउन सकिने निर्णय भएको छ,’ मन्त्री पौडेलले भने, ‘बढेको सिट मध्ये ३३ प्रतिशत विदेशी सिट छुट्टाइने छ ।’ आयोगको सिमितिले गरेको निर्णयलाई पूर्ण बैठकमा ल्याएर मात्रै अनुमोदन गरिने उनले बताए ।