दोश्रो मेडिकल टुरिजम एशिया समिट २०१९ राजधानीमा सुरु, महतोले गरे उद्घाटन

हेल्थ टुडे,
काठमाडौं, ११ पुस : दोश्रो मेडिकल टुरिजम एशिया समिट २०१९ शुक्रबारदेखि राजधानीको याक एण्ड यति होटेल दरवारमार्गमा सुरु भएको छ । दुई दिनसम्म चल्ने समिटको नेपाल मेडिकसिटी हस्पिटलका अध्यक्ष उपेन्द्र महतोले रिवन काटेर उद्घाटन गरेका हुन । एक्स्प्लोर प्रोडक्टिभ चेम्बर अफ कमर्स र नेपाल मिडिकल टुरिजम अर्गनाइजेसनको संयुक्त आयोजनामा समिट सुरु भएको हो । उद्घाटन कार्यक्रममा बोल्दै महतोले नेपालको स्वास्थ्य सेवाको विकास प्रतिस्पर्धाले नभएर सहकार्य र सुमन्वयले मात्र संभव भएको बताए । स्वदेशी र विदशी स्वास्थ्य सेवा प्रदायकहरुलाई एक ठाउँमा ल्याएर सहकार्यको सुरुवात हुनु समिटको सफलता भएकोमा महतोले जोड दिए । नेपालमा स्वास्थ्य पर्यटनका प्रसस्त संभावना भएको औल्याउदै उनले यी अवसरहरुलाई खेर जान दिनु नहुने बताए ।
नेपाल मेडिकल टुरिजम अर्गनाइजेसनका अध्यक्ष कृष्ण पाण्डेले नेपालको स्वास्थ्य सेवालाई विदेशमा समेत प्रचारप्रसार गरेर स्वास्थ्य पर्यटनको विकास गर्न समिट आयोजना गरिएको बताए । वीर अस्पतालका पूर्व निर्देशक डा. बुलन्द थापाले यस किसिमका समिटमा स्वास्थ्य क्षेत्रमा स्वदेशी र विदेशी अनुभव आदानप्रदान हुने भएकाले अझ प्रभावकारी हुने बताए ।
नेपाल मेडिकल टुरिजम अर्गनाइजेसनका प्रवन्ध निर्देशक अर्जुन चन्दले नेपाल सरकारले मनाउन लागिरहेको नेपाल भ्रमण वर्ष २०२० लाई समिटले ठूलो सकारात्मक प्रभाव पार्नेमा जोड दिए । स्वास्थ्य पर्यटनका लागि नेपाल सरकारले पनि पहल गर्नु पर्ने आवश्यक रहेको चन्दले बताए । समिटमा स्वदेशी र विदेशी गरि दुई करिव तीन दर्जन अस्पताल र स्वास्थ्य सेवा प्रदायकहरुले स्टल राखेर जानकारी गराइरहेका छन । स्वास्थ्य क्षेत्रका विभिन्न विज्ञहरुले शनिबार करिव दुई दर्जन कार्यपत्र प्रस्तुत हुने आयोजकले जानकारी दिएको छ । चन्दका अनुसार शनिबार स्वास्थ्य तथा जनसंख्या मन्त्री भानुभक्त ढकालले पनि समिटमा भाग लिने छन् ।