मेडिकल काउन्सिलका रजिष्ट्रार डा. सतिशकुमार देवले पदभार सम्हाले

हेल्थ टुडे,
काठमाडौं, १८ फागुन : नेपाल मेडिकल काउन्सिलका रजिष्ट्रार डा. सतिशकुमार देवले पदभार सम्हालेका छन् । काउन्सिलको कार्यालय बासबारीमा पुगेर शुक्रबार उनले पदभार सम्हालेका हुन । डा. देवलाई सरकारले नेपाल मेडिकल काउन्सिलको रजिष्ट्रारमा नियुक्त गर्ने निर्णय गरेको थियो । पदभार ग्रहण कार्यक्रममा काउन्सिलका निमित्त रजिष्ट्रार डा. विश्वराज दवाडी सहित काउन्सिलका सदस्यहरु र कर्मचारीहरुले नव नियुक्त रजिष्ट्रार डा. देवलाई स्वागत गरेका थिए । पदभार ग्रहण पछि डा. देवले आफुलाई रजिष्ट्रारको जिम्मेवारी सुम्पिएकोमा प्रधानमन्त्री पुष्पकमल दाहाल र स्वास्थ्य तथा जनसंख्या मन्त्री मोहनबहादुर बस्नेतप्रति आभार व्यक्त गर्दै दिइएको जिम्मेवारी इमान्दारिताका साथ पुरा गर्ने बताए । चिकित्सकहरुलाई पेशा प्रति इमान्दार बनाउनमा काउन्सिलको सम्पूर्ण ध्यान जानेमा उनले जोड दिए । त्रिवि शिक्षण अस्पतालमा फर्माकोलोजीका सहप्राध्यापक डा. देवसँग निर्वाचित सदस्यका रुपमा दुई कार्यकाल मेडिकल काउन्सिलमा काम गरेको अनुभव छ । उनले हेटौडास्थित मदनभण्डारी स्वास्थ्य विज्ञान प्रतिष्ठानको रजिष्ट्रार भएर पनि दुई वर्ष काम गरेका थिए ।