स्वास्थ्यमन्त्री पौडेलको अर्जुनदृष्टि : स्वास्थ्य विमा सुधार्ने र औषधिको मूल्य घटाउने

हेल्थ टुडे,
काठमाडौं, ८ कात्तिक : स्वास्थ्य तथा जनसंख्या मन्त्री प्रदीप पौडेलले स्वास्थ्य विमाको अहिलेको एक लाख रुपैयाको दायरा बढाएर पाँच लाख रुपैया पुर्याउने र औषधिको मूल्य समायोजन गरेर जनतालाई उपचारमा सहुलियत दिने कुरामा आफ्नो अर्जुनदृष्टि रहेको बताएका छन् । आफुले स्वास्थ्य मन्त्रालयको जिम्मेवारी सम्हालेको १०० दिन पुगेको अवसरमा गरेका प्रमुख उपलब्धिहरुको सार्वजनिक गर्न आयोजना गरेको पत्रकार सम्मेलनमा मन्त्री पौडेलले यी दुबै काम चुनौतिपूर्ण भए पनि पुरा गरेरै छाड्ने दावी गरे । डा. शम्भु आचार्यको संयोजकत्वमा गठित समितिले स्वास्थ्य बीमाको सीमा पाँच लाख पु¥याउने लगायतका विषयमा विस्तृत अध्ययन गरी राय सुझाव दिने जानकारी मन्त्री पौडेलले दिए ।
औषधि मूल्य समायोजनको गर्ने मन्त्री पौडेलले बताए । ‘मूल्य समायोजन हुन्छ र सबै औषधिको मूल्य घट्छ । यो मेरो दाबी हो,’ उनले भने । मन्त्री पौडेलले विभिन्न १६ शिर्षकमा हासिल गरिएका उपलब्धिहरु सार्वजनिक गर्दै क्यान्सर रोगको उपचार बिस्तार गरिएको, जलनको उपचार प्रमुख सरकारी अस्पतालहरुका निशुल्क गरेको, स्वास्थ्य विमा सुधार्न उच्च स्तरीय समिति गठन गरेको, अस्पतालहरुमा टोकन प्रणाली लागु गरेको, ओपिडी सेवा दुई सिफ्टमा सञ्चालन गरेको लगायतका कामको सुरुवात गरेको मन्त्री पौडेलले बताए । १०० दिनमा धेरै काम गर्न नसकेपनि धेरैजसो कामको सुरुवात गरेको उनले दावी गरे । केही समय त स्वास्थ्य मन्त्रालय,यसको संरचना र समस्या पहिचान गर्न मै समय लागेको बताउदै मन्त्री पौडेलले अव भने दृत गतिमा काम अगाडि बढाउने बताए । स्वास्थ्य मन्त्रालयका सचिव डा. रोसन पोखरेलले मन्त्रालयले अल्पकालिन र दिर्घकालिन गरेर विभिन्न कार्यक्रमको सुरुवात गरेको दावी गरे ।