एनएचआरसीले अहिलेसम्म २०० अनुसन्धान गरेको छ, १५ हजारलाई स्वीकृति दिएको छ : डा.जोशी

हेल्थ टुडे,
काठमाडौं, २८ चैत : नेपाल स्वास्थ्य अनुसन्धान परिषद् (एनएचआरसी) का कार्यकारी सदस्य सचिव डा.प्रमोद जोशीले परिषद्ले अहिलेसम्म २०० वटा अनुसन्धान गरेको र १५ हजार अनुसन्धानलाई स्वीकृति दिएको बताएका छन् । नेपाल स्वास्थ्य अनुसन्धान परिषद्को स्थापना दिवसको अवसर पारेर परिषदले राजधानीको सोल्टी होटेलमा बिहीबारदेखि आयोजना गरेको ११ औं स्वास्थ्य तथा जनसंख्या वैज्ञानिकहरुको शिखर सम्मेलनको उदघाटन सत्रमा बोल्दै कार्यकारी सदस्य सचिव डा. जोशीले परिषदले आफ्नो स्थापनाको ३४ वर्षमा २०० सय वटा अनुसन्धान परिषद् आफैले गरेको, १५ हजार अनुसन्धानका लागि स्वीकृति प्रदान गरेको र १५ हजार अनुसन्धानकर्तालाई तालिम प्रदान गरेको जानकारी दिएका हुन । परिषदले विगत ११ वर्षदेखि गर्दै आइरहेको स्वास्थ्य तथा जनसंख्या वैज्ञानिकहरुको शिखर सम्मेलनले राष्ट्रिय तथा अन्तर्राष्ट्रिय विज्ञहरू, अनुसन्धानकर्ता र शिक्षाविद्हरूबीच सहकार्य र छलफलको एक सशक्त मञ्च प्रदान गरेको बताउदै डा. जोशीले सम्मेलनबाट प्राप्त सुझाव र निश्कर्ष नीति निर्माणका लागि सरकारलाई हस्तान्तरण गरिने जानकारी दिए ।
११ औं सम्मेलनको विषयवस्तु “स्वास्थ्य, जलवायु र जनसंख्या गतिको अन्तरसम्बन्धः दिगो र समान भविष्यका लागि प्रत्युत्तरदायी स्वास्थ्य प्रणाली निर्माण” हो, जसले जलवायु परिवर्तन, जनसंख्या गतिको बदलाव र सार्वजनिक स्वास्थ्यबीचको जटिल सम्बन्ध बुझ्न र त्यसको प्रत्युत्तर दिन आवश्यक रहेको कुरालाई उजागर गरेको डा. जोशीले बताए ।
उनले भने, “जलवायु परिवर्तनले रोगहरूको संक्रमण ढाँचामा परिवर्तन ल्याइरहेको छ,जुन हालको कमजोर स्वास्थ्य प्रणालीमा थप चुनौती थपिरहेको छ । त्यस्तै तीव्र जनसंख्या रूपान्तरणले नयाँ स्वास्थ्य आवश्यकता उत्पन्न गराइरहेको छ । यसकालागि प्रमाणमा आधारित, समावेशी र लचिलो स्वास्थ्य प्रणाली आवश्यक छन् । ” सम्मेलनमा १०० भन्दा बढी अन्तर्राष्ट्रिय तथा १००० भन्दा बढी राष्ट्रिय प्रतिनिधिको सहभागिता रहेको डा. जोशीले जानकारी दिए । नेपालमा युवा अनुसन्धानकर्ताहरूको सहभागितामा गर्व गर्न लायक भएको बताउदै डा. जोशीले उहाँहरुको नवीन दृष्टिकोण र उर्जाले अनुसन्धानको क्षेत्रलाई नयाँ दिशा दिएको दाबी गरे ।
भविष्यमा, नवप्रवर्तन र समावेशितालाई ध्यानमा राख्दै सबै प्रदेशहरूमा शाखा स्थापना गर्दै स्थानीय सन्दर्भमा आधारित अनुसन्धान विस्तार गर्ने समेत डा. जोशीले बताए । डिजिटल रूपान्तरण र कृत्रिम बुद्धिमत्ता जस्ता प्रविधिलाई स्वास्थ्य अनुसन्धानमा जिम्मेवार तरिकाले समावेश गर्ने दिशामा पनि कार्य भइरहेको उनले जानकारी दिए । सम्मेलनमा हुने छलफल, विचारहरू र सहकार्यले स्वास्थ्य प्रणालीलाई अझ प्रत्युत्तरदायी, समान र दिगो बनाउने दिशामा मार्गदर्शन गर्नेमा उनको जोड थियो ।