नेपाल आयुर्वेद चिकित्सक संघले मनायो २८ औं बार्षिकोत्सब

हेल्थ टुडे,
काठमाडौं,२१ असार : आयुर्वेद चिकित्सकहरुको छाता संगठन नेपाल आयुर्वेद चिकित्सक संघले राजधानीमा शनिबार २८ औं वार्षिकोत्सव मनाएको छ । बार्षिकोत्सव समारोहमा आयुर्वेद र वैकल्पिक चिकित्सा क्षेत्रमा अधिकांश आयुर्वेद चिकित्सकहरुको सहभागिता रहेको थियो । कार्यक्रममा नेपाल आयुर्वेद चिकित्सक संघका अध्यक्ष डा. श्यामबाबु यादवले संघको २८ औं वार्षिकोत्सवको उपलक्ष्यमा सम्पूर्ण चिकित्सकहरुलाई शुभकामना व्यक्त गर्दे आयुर्वेदको क्षेत्रमा भइरहेका प्रयासमा सबैकाृ साथ र सहयोग हुनु पर्ने बताए । देशका ७५३ वटै पालिकामा आयुर्वेदको पहूच आगामी आर्थिक वर्षसम्म पुग्ने सुनिश्चित भएकोमा खुशी व्यक्ति गर्दे अध्यक्ष यादवले आयुर्वेद उपचार प्रति उपभोक्तालाई विश्वास दिलाउन हामी सबैले लाग्नु पर्ने बेला आएकोमा जोड दिए । संघका उपाध्यष ऐश्वर्या श्रेष्ठले आयुर्वेद प्रति जनताको विश्वास जगाउन सक्नु पर्ने चुनौति सामना गर्न सबै लाग्नु पर्ने बताइन । आयुर्वेदको वर्तमान अवस्था विषयक कार्यपत्र प्रस्तुत गर्दै डा. सरिता बजगाईले देश भरिका ५, १० र १५ शैयाका अस्पतालहरुमा आयुर्वेदको दरवन्दी स्थपना भएको र विस्तारै यसलाई वडास्तरसम्म लैजानु पर्ने आवश्यकता रहेको बताइन । कार्यक्रममा संघका पुर्व अध्यक्ष डा. प्रकाश ज्ञवाली, आयुर्वेद औषधि उत्पादक संघका अध्यक्ष सुमन पाण्डे, स्वास्थ्य मन्त्रालयका नीति योजना साखा प्रमुख डा. पुष्पराज पौडेल लगायतले आयुर्वेदको ऐतिहासिक महत्वका विषयमा चर्चा गर्दे यसको व्यवहारिक प्रयोग र जनताको विश्वास जित्न अझै नयाँ ढंगले काम गर्नु पर्ने बताए । संघको स्थापना विसं २०५४ साल असार २० गते भएको थियो ।