स्वासप्रस्वास सम्बन्धि सेवा दिन ललितपुरको मान भवनमा खुल्यो नेशनल चेष्ट सेन्टर

हेल्थ टुडे,
ललितपुर, २ फागुन : ललितपुरको मान भवनमा स्वासप्रश्वास ( छाती) सम्बन्धि रोग सम्बन्धी सम्पुर्ण सेवा प्रदान गर्ने उद्देश्यका साथ नेशनल चेष्ट सेन्टर खुलेको छ । उक्त सेन्टरको एक समारो्हबिच सनिबार ललितपुर महानगरपालिका वडा नम्बर १३ का वडा अध्यक्ष गणेश केसी, स्वासप्रस्वास तथा छाती रोग विज्ञ डा. राजु पंगेनी, सेन्टरका संचालक मधुसुदन घिमिरे सहितले रिवन काटेर उदघाटन गरेका हुन ।
उदघाटन कार्यक्रममा बोल्दै वडा अध्यक्ष केसीले छाती रोग सम्बन्धी सम्पूर्ण सेवा एकै छानामुनी उपलब्ध गराउने उद्देश्यले सेन्टर स्थापना हुनु खुशीको कुरा भएको बताउदै महानगरपालिकाको तर्फबाट सहकार्य गरेर अगाडि बढ्ने बताए । स्वासप्रस्वासका विरामीको संख्या बढ्दै गएकोले वडाले सेन्टरसंगको सहकार्यमा स्वास्थ्य सिविर सञ्चालन र उपचारमा सक्दो सहयोग गर्नेमा केसलिे जोड दिए । स्वासप्रस्वास तथा छाती रोग विज्ञ डा. पंगेनीले स्वासप्रस्वास दिन प्रतिदिन गम्भीर जनस्वास्थ्य समस्याको रूपमा बढ्दै गएको तथ्यांक प्रस्तुत गर्दै स्वाशप्रश्वास सम्बन्धि केन्द्रीत भएर छुट्टै सेन्टरको स्थापना भएपछि विरामीले सहज सेवा पाउने बताए ।
सेन्टरका सञ्चालक घिमिरेले सेन्टरले विशेषज्ञ सेवा एउटै छानामुनि उपलब्ध गराउने लक्ष्य लिएको र सेन्टरमा वरिष्ठ छाती तथा स्वासप्रश्वास रोग विशेषज्ञ चिकित्सकहरूको टोलीले नियमित परामर्श, परीक्षण तथा उपचार सेवा प्रदान जानकारी दिए । उनले सेन्टरमा फोक्सोको कार्यक्षमता परीक्षण, डिजिटल एक्स–रे तथा आवश्यक इमेजिङ सुविधा, एलर्जी तथा दमको परीक्षण सम्बन्धि सेवा, सिओपीडी, दम, क्षयरोग तथा अन्य दीर्घकालीन स्वासप्रश्वास रोगको समग्र उपचार लगायतका सेवा उपलब्ध रहेको बताए ।
घिमिरेका अनुसार सेन्टरले दीर्घकालीन लक्ष्य स्वासप्रश्वास रोगको रोकथाम र जनचेतना अभिवृद्धि गर्ने काम पनि गर्ने छ । नियमित स्वास्थ्य परीक्षणको महत्वबारे जानकारी गराउने, वायु प्रदूषणबाट जोगिने उपायबारे सचेतना फैलाउने, सुर्तीजन्य पदार्थ त्याग्न प्रोत्साहन गर्ने तथा विद्यालय, कलेज र समुदाय स्तरमा जनचेतनामूलक कार्यक्रम सञ्चालन गर्ने पनि सेन्टरको योजना रहेको घिमिरेले बताए ।