स्वास्थ्य प्राथमिकतामा छलफल गर्न दक्षिण–पूर्वी एसियाका स्वास्थ्यमन्त्री भेला हुँदै

हेल्थ टुडे,
काठमाडौं, १८ भदौ : विश्व स्वास्थ्य संगठन (डब्लूएचओ) को दक्षिण–पूर्वी एसिया क्षेत्रका स्वास्थ्यमन्त्री तथा वरिष्ठ अधिकारीहरू आगामी साता टिमोर–लेस्तेको राजधानी दिलीमा भेला हुँदैछन्। सेप्टेम्बर ७ देखि १० सम्म हुने ध्ज्इ दक्षिण–पूर्वी एसिया क्षेत्रीय समितिको ७९औँ बैठकमा क्षेत्रका प्रमुख स्वास्थ्य प्राथमिकताबारे छलफल हुनेछ।

बैठकमा विशेषज्ञ स्वास्थ्य सेवामा समान पहुँच, क्षयरोग अन्त्य, डिजिटल स्वास्थ्य तथा कृत्रिम बुद्धिमत्ता (एआई) को उपयोगलाई प्राथमिकताका साथ अघि बढाइनेछ।

दक्षिण–पूर्वी एसिया क्षेत्रमा सन् २०२४ मा मात्रै अनुमानित ३६ लाख ८० हजार नयाँ क्षयरोगका बिरामी र ४ लाख ३३ हजार मृत्यु भएको डब्लूएचओले जनाएको छ। क्षयरोगको प्रारम्भिक पहिचान, रोकथाम र प्राथमिक स्वास्थ्य सेवासँग यसको एकीकरणलाई थप प्रभावकारी बनाउने विषयमा पनि बैठकमा छलफल हुनेछ।

यसैगरी, सार्वभौमिक स्वास्थ्य पहुँच, प्राथमिक स्वास्थ्य सेवा, स्वास्थ्य संस्थाको आपत्कालीन तथा जलवायुजन्य जोखिमसँग जुध्ने क्षमता, गुणस्तरीय औषधि तथा स्वास्थ्य उपकरणको पहुँच लगायतका विषय बैठकका प्रमुख एजेन्डा छन्।

डब्लूएचओका महानिर्देशक डा. टेड्रोस अधानोम गेब्रेयसससहित वरिष्ठ अधिकारीहरूको सहभागिता रहने बैठकले आगामी वर्षका लागि क्षेत्रीय स्वास्थ्य एजेन्डालाई थप दिशानिर्देश गर्ने अपेक्षा गरिएको छ ।