पूर्व स्वास्थ्य मन्त्री गगन थापा खतरामुक्त

हेल्थ टुडे,
काठमाडौं, १८ मंसिर : वम विस्फोटमा घाइते भएका पूर्व स्वास्थ्य मन्त्री एवं काठमाडौं क्षेत्र नम्बर ४ प्रतिनिधि सभा सदस्य उम्मेदवार गगन थापा खतरामुक्त रहेको उपचारमा संलग्न चिकित्सकले बताएकाछन् । उनको अहिले महाराजगञ्चस्थित त्रिवि शिक्षण अस्पतालमा उपचार भइरहेको छ । उपचारमा संलग्न त्रिवि शिक्षण अस्पतालका चिकित्सक डा. सुवास आचार्यले थापाको कानमा र ढाडका चोट लागेको र उनी खतरामुक्त रहेको बताएका छन् । चुनावी प्रचार प्रसारको अन्तिम दिन बुढानिलकण्डको चपलीमा थापालाई केन्द्रित गरेर बम बिस्फोट भएको थियो । विस्फोटमा थापा सहित आठ जना घाइते भएका थिए । गम्भिर घाइतेहरुमध्ये ४ जनाको उपचार भइरहेको छ । थापा घाइते भएको खवर पाएपछि सयौं कार्यकर्ताको त्रिवि शिक्षण अस्पतालमा भिड लागेको छ । थापाले पत्रकारहरुसँग समान्य कुराकानी गर्दै विचलित नहुन सम्पूर्ण मतदातालाई आग्रह गरेका छन् । उनले कायरहरुले यो घटना गराएकोले त्यसको प्रतिकार गर्न सबैलाई आव्हान गरेका छन् । पूर्व मन्त्री थापालाई उपचार पछि चाडै डिस्चार्ज गरिने उपचारमा चिकित्सकले बताएका छन् ।