डाक्टरले आमालाई कबुल गरेको रकम नतेरेपछि

ताइवानको उच्च अदालतले एक दन्तचिकित्सकलाई आफ्नी आमालाई करीब १० लाख डलर तिर्न आदेश दिएको छ । छोराको पढाइकालागि खर्च भएको रकमबापत सो रकम फिर्ता गर्न फैसला सुनाइएको हो । लुओ नाम भएकी महिलाले सन् १९९७ मा आफ्ना छोराहरूसँग एक सम्झौता गरेकी थिइन् । सम्झौताअनुसार पढाइलेखाइ सकेर काम थालेपछि छोराले आमालाई मासिक आम्दानीको ६० प्रतिशत बुझाउनुपर्ने थियो । सम्झौता हस्ताक्षर गर्दा सो डाक्टरको उमेर करीब २० वर्ष भएको बताइएको छ । तर, जागीर खाँदा समेत कान्छो छोरा चुले आफूलाई भनेअनुरूप रकम तिर्न नमानेपछि ती महिलाले छोराविरुद्ध मुद्दा हालेकी थिइन् । बच्चा हुर्काएबापत बुढेसकालमा पैसा माग्नु गलत भएको भन्दै चुले आमालाई पैसा नदिने तर्क गरेका थिए ।

तर, अदालतले भने आमा र छोराबीचको सम्झौता वैधानिक भएको फैसला सुनाएको छ । अदालतले आमालाई दिनुपर्ने रकम भुक्तानी गर्नुका साथै ब्याजसमेत तिर्न सो व्यक्तिलाई आदेश दिएको छ । पतिले आफूसँग सम्बन्धविच्छेद गरेपछि ती महिला एक्लैले दुई छोरा हुर्काएकी थिइन् । दुवै छोरालाई दन्तचिकित्सका पढाइमा लाखौं डलर खर्च भएको, तर बुढेसकालमा आफूलाई नपाल्ने हुन् कि भन्ने चिन्ताले सम्झौता गरेको ती महिलाले भनेकी छन् । महिलाले दुवै छोरासँग सम्झौता गरेकी थिइन् । जसमा कुल १७ लाख डलर भुक्तानी गर्ने सहमति गरिएको थियो । जेठो छोराले सानो रकममै चित्त बुझाउन आमालाई मनाएको बताइएको छ । तर, कान्छो छोराले सम्झौतामा हस्ताक्षर गर्दा आफू निकै सानो भएको र सम्झौता अवैधानिक हुनुपर्ने तर्क दिएर पैसा तिर्न मानेनन् ।

पढाइ सकेपछि आफूले आमाको डेण्टल क्लिनिकमा वर्षौं काम गरेको र अदालतले तिर्न भनेकोभन्दा धेरै रकम कमाउन उनलाई मद्दत गरेको चुको दाबी छ । सम्झौता गर्दा चु वयस्क भएको र सम्झौतामा स्वविवेकले हस्ताक्षर गरेकाले भुक्तानी दिनुपर्ने निर्णय गरिएको सर्वोच्च अदालतकी प्रवक्ताले बताएकी छन् । वयस्क छोराछोरीले बूढा भएका आमाबाबुलाई हेर्नै पर्ने ताइवानको कानूनमा छ । तर, अधिकांश अभिभावकले आफूलाई नहेर्ने छोराछोरीलाई मुद्दा हालेका छैनन् । आमाछोराबीच पढाएबापत बुढेसकालमा मासिक भुक्तानी गर्नुपर्ने सम्झौताका कारण यो घटनालाई धेरैले अनौठो मानेका हुन् । (बिबिसी)