धरानमा फैलिएको डेङ्गु नियन्त्रण हुन सकेन, एकैदिन थपिए ८९ जना नयाँ बिरामी

हेल्थ टुडे,
धरान,२९ जेठः करिब ५ साताअघिदेखि सुनसरीको धरान उपमहानगरपालिकामा फैलिएको डेङ्गुको प्रकोप नियन्त्रण बाहिर गरेको छ । तर, सरकारले भने प्रकोप नियन्त्रण बाहिर नगएको दावी गरिरहेको छ । मंगलबार मात्रै एकै दिनमा ८९ बिरामी थपिएका छन् । सोमबारसम्म ३६८ जना सङ्क्रमित रहेका थिए ।

मंगलबारसम्म धरानमा एक हजार चार सय व्यक्तिको रगत परीक्षण गर्दा ४५७ डेङ्गु सङ्क्रमित देखिएका छन् । धरानस्थित बीपी कोइराला स्वास्थ्य विज्ञान प्रतिष्ठानका उपकुलपति प्रा डा राजकुमार रौनियारले प्रतिष्ठानमा डेङ्गुसम्बन्धीका विज्ञ चिकित्सक भएकाले उपचारमा कुनै समस्या नभएको दावी गरेका छन् । डेङ्गुको सेरोटाइपिङ (प्रकार) छुट्याउने मेसिन सहयोगका लागि अस्पतालको पहलमा अमेरिकाको एक युनिभर्सिटीलाई पत्राचार गरिएको प्रतिष्ठानले जनाएको छ ।

डेङ्गुको जिवाणु पत्ता लगाउन ल्याब टेष्टका लागि किट कम आउने गरेकाले इपिडिमियोलोजी तथा रोग नियन्त्रण महाशाखालाई प्रयाप्त किट पठाउन र आवश्क किट रिजर्भ राख्न धरानका जनप्रतिनिधिले आग्रह गरेका छन् । प्रतिष्ठानले धरान उपमहानगरलाई डेङ्गुको महामारी क्षेत्र घोषणा गर्न प्रदेश सरकारलाई आग्रह गरेको छ ।