एक दशकमा म्याग्नसको फड्को, ८६ भन्दा बढी प्रकारका औषधि उत्पादन गर्दै

हेल्थ टुडे,

काठमाडौं : स्वदेशी औषधि उद्योगमा छुट्टै पहिचान बनाउन सफल म्याग्नस फर्माले एक दशकको यात्रा पार गरेको छ । १० र्औ बार्षिकोत्सवको अवसरमा बुधबार रानधानीमा आयोजित कार्यक्रममा फर्माले हरेक वर्ष उल्लेखनिय प्रगति गर्दै नेपाली औषधि बजारमा आफ्नो छुट्टै अस्तित्व स्थापित गर्न सकेको दाबी गरेको छ । एक दशकको अवधिमा कम्पनीले अत्याधुनिक उपकरणमार्फत ८६ भन्दा बढी प्रकारका औषधि उत्पादन गरिरहेको  जनाएको छ ।

यीमध्ये पाँचथरी औषधि नेपालमै पहिलोपटक उत्पादन गरिएको हो। म्याग्नसले उत्पादन गरेका १० थरी औषधि ब्रान्ड लिडरको रूपमा बजारमा स्थापित भएको कम्पनीको दाबी छ ।  सन २००७ मा कम्पनी स्थापना गरी त्यसको दुई वर्षपछि औषधि उत्पादन शुरु गरेको कम्पनीले आफ्नो उत्पादन क्षमतालाई अन्तर्रा्ष्ट्रिय रूपमा प्रतिस्पर्धा गर्न सक्नेगरी विकास गरिरहेको कम्पनीका प्रबन्ध निर्देशक प्रेम कुमार जाटियाले बताए। उनले विश्व स्वास्थ्य संगठनको निर्देशन बमोजिम कुशल औषधि उत्पादन प्रकृया पूरा गरेको पनि जानकारी दिए। ‘हामीले संख्या भन्दा पनि औषधिको गुणस्तरलाई ध्यानमा राख्दै आएका छौँ’, उनले भने, ‘कम्पनीलाई १० वर्षमा ‘टप टेन’ मा पार्न कर्मचारीको ठूलो हात छ। २३ जनाबाट शुरु गरिएको कम्पनीमा हाल दुई सय ५० कर्मचारी कार्यरत छन्।

कार्यक्रममा औषधि व्यवस्था विभागका निमित्त महानिर्देशक पानबहादुर क्षेत्रीले औषधि उद्योगमध्ये म्याग्नसले छोटो समयमा नै आफूलाई स्थापित गरेको बताए। ‘उद्योग भनेका राष्ट्रका सम्पत्ति हुन्’, उनले भने, ‘यिनीहरूलाई कसरी संरक्षण गर्ने भन्ने नीति ल्याउन जरुरी छ।’