प्रकाशको निधन हृदयघातले ! यथार्थ शंकाको घेरामै

हेल्थ टुडे,

काठमाडौं,३ मंसिर : थापाथलीस्थित नर्भिक अस्पतालमा आईतबार बिहान उपचारका लागि  ल्याइएका माओवादी केन्द्रका अध्यक्ष प्रचण्डका छोरा प्रकाश दाहालको  निधन भएको छ। हृदयघातका कारण निधन भएको भनिएतापनि उनको शरीरमा लागेको चोटका कारण निधन भएको आशंका चिकित्सकहरुले गरेका छन्। अस्पतालको आकस्मिक कक्षमा उपचारका लागि ल्याउँदा उनको मृत्यु भइसकेको अस्पताल स्रोतले जनाएको छ ।

उनको शरीरमा के कारणले चोट लागेको हो त्यो भने उनको उपचारका लागि ल्याएकाहरुले पनि नबताएको जनाइएको छ। प्रकाशको उपचार शुरु हुनु अघी नै चिकित्सकहरुले उनको  निधनको घोषणा गरेका थिए।

प्रचण्ड  काठमाडौं आइसकेपछि उनको निधनको औपचारिक घोषणा हुने बताइएको छ। निधनको कारण समेत अस्पतालले परिवारको परामर्शमा सार्वजनिक गर्ने बताइएको छ। उनको निधनको समाचारले कार्यकर्ताहरु शोकमा रहेका छन्। कतिपयले उनको निधनमा षडयन्त्र भएको भन्दै छानविन हुनुपर्ने बताइरहेका छन् । माओवादी कार्यकर्ताहरुको चाप अहिले अस्पतालमा बढेको छ।