स्वास्थ्य सेवा ठप्प पार्नेसम्मका आन्दोलन घोषणा गर्न चिकित्सक संघको आकस्मिक बैठक आज बस्दै

हेल्थ टुडे,

काठमाडौं, २६ असार : चिकित्सा शिक्षा विधेयक र डा. गोविन्द केसीका मागका बिषयमा सरकारलाई थप दवाव दिन ससक्त आन्दोलनका कार्यक्रम घोषणा गर्न नेपाल चिकित्सक संघको आकस्मिक बैठक आज बस्दैछ । संघले आईतबार प्रधानमन्त्री केपी ओलीलाई भेटर केसीले उठाएका माग सम्बोधन गर्न ७२ घण्टा को अल्टिमेटन दिएको थियो । अल्टिमेटमको समय आज दिउँसो सकिदैछ । माग पुरा गर्न सरकारले पहलकदमी नचालेपछि संघले दवावमुलक कार्यक्रम घोषणा गर्न आकस्मिक बैठक बोलाएको हो । संघले देश भरिका स्वास्थ्य संस्थामा उपचार सेवा बहिस्कार गर्नेसम्मको कार्यक्रम अगाडि सार्नसक्ने संघका एक अधिकारीले बताए । ती अधिकारीले भने, डा. केसीको जिवन रक्षा र चिकित्सा शिक्षाको सुधारका लागि संघले बाध्य भएर कडा भन्दा कडा कदम अगाडि बढाउदै छ । संघले आज २ बजे आकस्मिक बैठक बोलाएको छ ।

संघका महासचिव डा. लोचन कार्की नेतृत्वको चिकित्सक टोलीले प्रधानमन्त्री ओलीलाई भेटेर अहिलेको अवस्थाका बिषयमा जानकारी गराएपनि प्रधानमन्त्रीले त्यसलाई गम्भिरताका साथ लिएका थिएनन् । त्यसैगरि संघको टोलीले सोमबार स्वास्थ्य मन्त्री उपेन्द्र यादवलाई पनि भेटेर समस्या समाधानका लागि पहल गरिदिन आग्रह गरेका छ । यादवले अस्पताल बन्द गर्ने जस्तो कठोर आन्दोलन नगर्न संघका पदाधिकारीलाई आग्रह गरेका थिए । समस्या समाधानका लागि आफूले पहल कदमी चाल्ने आश्वासन यादवले दिएका थिए ।

डाक्टर केसीका माग पुरा नगरे डाक्टरहरूले इमर्जेन्सी बाहेक अन्य सेवा ठप्प पार्ने गरि आन्दोलन गर्ने चेतावनी प्रति प्रम ओलीले पनि आपत्ती जनाएका थिए ।  उनले  डाक्टरहरूले स्वास्थ्य सेवा बन्द गर्न नपाइने जिकिर गरेका थिए । आफूहरूले विरोध गर्ने अधिकार रहेको संघका अधिकारीले गराएका थिए । चिकित्सक संघका अध्यक्ष डा. मुक्तीराम श्रेष्ठले सरकारलाई ७२ घण्टाको अल्टिमेटम दिदा समेत मागका बिषयमा सुनवाई नभएकाले बाध्यत्मक निर्णय लिन बैठक बस्न लागेको बताए ।