स्वास्थ्य सेवा ठप्प पार्ने चिकित्सक संघको चेतावनी

हेल्थ टुडे,

काठमाडौं, २६ असार : नेपाल चिकित्सक संघले आमरण अनसनरत  डा.  गोविन्द केसीले उठाएका माग तत्काल सम्बोधन नगरे आकस्मिक सेवा बाहेक देशभरका स्वास्थ्य सेवा बन्द गराउने चेतावनी दिएको छ । संघको मंगलबार दिउसो बसेको पदाधिकारी, पूर्व अध्यक्षहरु, अस्पतालका निर्देशकहरु र कार्यकारणी समितिको बैठकले उक्त निर्णग गरेको हो । डा. केसीका मागको समर्थन गर्दै संघले हरेक स्वास्थ्य संस्थामा एक घण्टा कालोपट्टी बाधेर विरोध प्रदर्शन गर्ने, मागका विषयमा दबाब दिने र यती गर्दा समेत माग पुरा नभए देश भरिनै स्वास्थ्य सेवा ठप्प पार्ने सरकारलाई चेतावनी दिएको छ । संघले उठाएका माग पुरा नगरे त्यसबाट उत्पन्न परिस्थितिको जिम्मा सरकारले नै लिनु पर्ने संघको जिकीर छ ।

संघका अध्यक्ष डा. मुक्तिराम श्रेष्ठले वरिष्ठ चिकित्सक केसीको माग तत्काल सम्बोधन नभए इमर्जेन्सी बाहेकका सबै सेवा बन्द गराउन आफूहरु बाध्य हुने बताए ।अध्यक्ष श्रेष्ठले प्रधानमन्त्री केपी ओली र स्वास्थ्य मन्त्री उपेन्द्र यादवलाई भेटेर संघले समस्या समाधानका लागि उच्च स्तरीय समिति तत्काल बनाउन माग गरेको तर पहल नभएको बताए ।

संघले स्वास्थ्य संस्था ठप्प पार्ने चेतावनी दिए पनि कहिलेबाट भन्ने तिथि भने उल्लेख गरेको छैन । सरकारले तत्काल माग पुरा नगरे त्यो तिथि पनि छिट्टै घोषणा हुने र त्यसको जिम्मा सरकारले लिनु पर्ने संघको जिकिर छ । डा.केसीका मागमा सहमती गराउन यो भन्दा पहिलेका अनसनमा पनि संघले स्वास्थ्य संस्था बन्द गर्नेसम्मको कदम चाल्ने गरेकाले सरकारलाई मागमा सहमत हुन बाध्य पार्ने गरेको थियो ।