भारतको राजधानी दिल्लीमा स्वास्थ्य संकटकाल घोषणा

हेल्थ टुडे,
एजेन्सी,१६ कात्तिकः भारतको राजधानी नयादिल्लीमा स्वास्थ्य संकटकाल (हेल्थ इमरजेन्सी) घोषणा गरिएको छ । राजधानी दिल्लीमा प्रदूषणको स्तर बढेपछि त्यहाँको सरकारले पब्लिक हेल्थ इमरजेन्सी घोषणा गरेको हो । केजरीवाल सरकारले दिल्लीका सबै विद्यालय नोभेम्बर पाँच सम्मका लागि बन्द गर्ने घोषणा गरेको छ ।

यसअघि दिल्लीका विद्यालयहरुमा प्रदूषणबाट बच्न मास्क वितरण गरिएको थियो । दीपावलीपछि दिल्लीको हावा निकै खराब भएको थियो । दिल्लीका आमनागरिकलाई स्वास फेर्न समेत अप्ठ्यारो भइरहेको सञ्चारमाध्यमहरुले जनाएका थिए । पछिल्ला दिनहरुमा अस्पतालमा बिरामीहरुको संख्या निरन्तर बढिरहेको छ ।

नयादिल्लीको हावामा प्रदूषणका खतरनाक कणको स्तर विश्व स्वास्थ्य संगठनको मानक भन्दा २० गुणा अधिक पुगेको जनाइएको छ । हावाको गुणस्तरमा आएको गम्भीर गिरावटलाई मध्य नजर राख्दै त्यहाँको सर्वोच्च अदालतले दिल्लीका साथै छिमेकी राज्यमा पनि केही कुराहरुमा प्रतिबन्ध लगाउने आदेश दिएको छ ।

पर्यावरण प्रदूषण प्राधिकरणले पाँच नोभेम्बरसम्म सबै किसिमका निमार्णको कार्यमा रोक लगाएको छ । यसअघि पनि पटक–पटक नयाँदिल्लीमा अत्यधिक वायु प्रदुषण हुने गरेको थियो ।