स्वास्थ्य सचिव बरालमाथि चिकित्सकलाई दुरव्यवहार गरेको आरोप

हेल्थ टुडे,
काठमाडौ : स्वास्थ्य तथा जनसंख्या मन्त्रालयका सचिव खगराज बराललाई चिकित्सकमाथि दुरव्यवहार र गालीगलौज गरेको आरोप लागेको छ । नेपाल मेडिकल काउन्सिलका पूर्व सदस्य एवं त्रिवि महाराजगन्ज मेडिकल कलेजका क्लिनिकल फार्माकोलोजी विभागका प्रमुख सह प्रा.डा. सतिसकुमार देवले सचिव बरालले चिकित्सकहरुलाई बारम्बार गालीगलौज गर्ने गरेको र आफूमाथि दुरव्यवहार गरेको भन्दै न्याय दिलाई दिन नेपाल चिकित्सक संघमा शुक्रबार निवेदन नै दर्ता गराएका छन । सचिव बराले गर्ने गरेको गालीगलौज र दुरव्यवहारका लागि आफू बाध्य भएर संघमा निवेदन नै दर्ता गराएको डा. देवले बताएका छन । डा. देव स्वास्थ्य विमा बोर्डका सदस्य पनि हुन । सचिव बरालले आफू तथा समग्र चिकित्सकमाथि स्वास्थ्यराज्यमन्त्रीको कार्यकक्षमा भएको बैठकमा गालीगलौज तथा दुरव्यवहार गरेको निवेदनमा उल्लेख गरेका छन् । १ फागुनमा स्वास्थ्यराज्यमन्त्री नवराज राउतसमेतको उपस्थितिमा बिमासम्बन्धी औपचारिक छलफलका लागि राखिएको बैठकमा बरालले आफूलाई व्यक्तिगत गालीगलौज गरेको तथा समग्र चिकित्सकलाई बिकाउको संज्ञा दिएको डा. देवको आरोप छ ।

राज्यमन्त्री राउतको उपस्थितिमा भएको छलफलमा सचिव बराल, स्वास्थ्य मन्त्रालयका सहसचिव डा. दीपेन्द्ररमण सिंह, डा. गुणराज लोहनी, प्रशासन समूहका सहसचिव रघुराम विष्टसमेत उपस्थित रहेको डा. देवले बताएका छन् । छलफलमा बिमा बोर्डका अध्यक्ष डा. उमाशंकर प्रसाद, कार्यकारी निर्देशक डा. रमेश पोखरेल, सदस्यहरू डा. दीपेन्द्र यादव, डा. अनिरा वैद्य, डा. देव स्वयम् र राज्यमन्त्री राउतका दुई स्वकीय सचिव भीमराज सिंह र कर्णराज आचार्यसमेत उपस्थित रहेको उनले जानकारी दिएका छन् ।
बरालले छलफलका बीच सार्वजनिक रूपमा चिकित्सकहरू बिक्ने गरेको अभिव्यक्ति दिएको डा. देवले बताएका छन् । उनका अनुसार बरालले आफू शिक्षासचिव हुँदा ४–५ जना प्राध्यापक आफूलाई ढोग्न आउने गरेको समेत बताएका थिए । यसअघि पनि बरालले अल्फा–बिटा भवन नयाँ बानेश्वरमा औषधि व्यवस्था विभागद्वारा आयोजित कार्यक्रमका बीच ‘चिकित्सकहरू सजिलै बिक्ने’ अभिव्यक्ति दिएका थिए । बराल स्वास्थ्य तथा जनसंख्या मन्त्रालयमा आउनुअघि शिक्षा मन्त्रालयमा सचिव थिए । ५ महिनाअघि शिक्षासचिवबाट स्वास्थ्यमा ल्याइएका थिए । स्वास्थ्य मन्त्रालय प्राविधिक मन्त्रालय भएकाले र डाक्टरहरुसँग काम गर्नु पर्दा आफूलाई मन्त्रालय बुझ्नै समय लागिरहेको बराल बताउदै आइरहेका छन् । चिकित्सक संघका नव निर्वाचित अध्यक्ष डा. लोचन कार्कीले आईतबार यस बिषयमा सचिव बरालसँग भेटेर कुरा गर्ने जानकारी दिए । डा. कार्कीले डा. देवको आरोपबारे पहिले राम्ररी बुझ्ने र सत्य पाइएमा चिकित्सकमाथि भएको दुब्र्यवहारविरुद्ध लड्ने उनले बताए ।
अध्यक्ष कार्कीले भने, ‘आरोप सही पाइएमा सचिवज्यूले माफी माग्नुपर्छ । पीडितको न्याय र पीडकलाई दण्डका लागि हामी आधिकारिक निकाय नभए पनि डा. देवले कानुनी उपचारको बाटो लिन चाहेमा हाम्रो सम्पूर्ण सहयोग हुन्छ ।’ हरेक पेसामा केही व्यक्ति खराब हुने र त्यसलाई लिएर समग्र पेसाकर्मीलाई आरोपित गर्न नमिल्ने डा. कार्कीको भनाइ छ ।