नेपालहेल्थप्रेसको प्रधान सम्पादकमा अतुल मिश्र नियुक्त

हेल्थ टुडे,
काठमाडौं, १० जेठ नेपाली पत्रकारिता क्षेत्रमा लामो समयदेखि योगदान दिदै आएका वरिष्ठ पत्रकार अतुल मिश्र ‘नेपालहेल्थप्रेस डट कम’ को प्रधान सम्पादक नियुक्त भएका छन ।
यसअघि उनी झन्डै २७ वर्ष देखि कान्तिपुर राष्ट्रिय दैनिक पत्रिका मा कार्यरत थिए भने पछिल्लो १६ वर्ष देखि त्यहाँ चिफ सब एडिटरको भूमिकामा थिए । जयानन्द मिडिया प्रालि को सञ्चालक समिति बैठकले मिश्र लाई प्रधान सम्पादक नियुक्त गर्ने निर्णय गरेको हो ।
पत्रकार मिश्रले आफ्नो पेसागत जीवनमा विज्ञान र स्वास्थ्य पत्रकारितामा विशेष विज्ञता राखेका छन् र विदेशी सञ्चार माध्यमहरू सँग पनि आबद्ध छन् । उनी सोसाइटी अफ हेल्थ केयर जर्नालिस्टको अध्यक्ष समेत हुन् ।
मिश्र ले राष्ट्रिय स्तरमा उत्कृष्ट स्वास्थ्य र विज्ञान पत्रकारिता पुरस्कारहरू, विभिन्न सम्मान र दुई दर्जन भन्दा बढी पुरस्कारहरू प्राप्त गरेका छन् । पछिल्लो समय नेपाल विज्ञान तथा प्रविधि प्रज्ञा प्रतिष्ठान (नाष्ट)ले उनलाई राष्ट्रिय विज्ञान पत्रकारिता पुरस्कारले समेत सम्मानित गरेको छ ।
नेपालहेल्थप्रेसले उनको नियुक्तिलाई विधा गत पत्रकारिता क्षेत्रमा एक महत्वपूर्ण कदमको रूपमा लिएको छ र उनको अनुभव र विशेषज्ञताले स्वास्थ्य पत्रकारितामा नयाँ आयाम थप्ने विश्वास व्यक्त गरेको छ । उनको नेतृत्वमा, संस्थाले स्वास्थ्य विज्ञान सम्बन्धी गहन, विश्लेषणात्मक समाचार प्रस्तुत गर्ने योजना समेत बनाएको छ ।
प्रधान सम्पादक मिश्रले आफ्नो नियुक्तिको प्रतिक्रियामा भनेका छन्, ‘म नेपालहेल्थप्रेसमा यो नयाँ भूमिकाको लागि उत्साहित छु र नेपाली स्वास्थ्य पत्रकारितालाई अर्को स्तरमा लैजाने चुनौतीलाई स्वीकार गर्छु । सही, विश्वसनीय, सन्तुलित र न्याय पूर्ण पत्रकारिता मेरो पहिलो प्राथमिकता हो । मेरो लक्ष्य अन्तर्राष्ट्रिय गुणस्तरमा खरो उत्रने स्वास्थ्य पत्रकारिता नेपाली भाषामा प्रस्तुत गर्नु हो । सँगै स्वास्थ्य, विज्ञान र यो सँग सम्बन्धित विविध पक्ष सहित नीति नियम सम्बन्धी जानकारीलाई अझ व्यापक र गहन तरिकाले प्रस्तुत गर्दै जानु हो ।’
मिश्रको नियुक्तिले पत्रकारिता क्षेत्रमा उनको लामो अनुभव र विशेषज्ञताको सम्मान गर्दै नेपाली स्वास्थ्य पत्रकारितामा नयाँ ऊर्जा थप्ने आशा गरिएको छ ।