स्वास्थ्य अनुसन्धान परिषदको सुदूरपश्चिममा साखा विस्तार,काउन्सिलरमा डा.अन्सारी नियुक्त

हेल्थ टुडे,
काठमाडौं, ५ माघ : नेपाल स्वास्थ्य अनुसन्धान परिषदले सुदूरपश्चिम प्रदेशमा आफ्नो साखा विस्तार गरेको छ । परिषदले सुदूरपश्चिम प्रदेश स्वास्थ्य अनुसन्धान काउन्सिलरमा डा.मेराज आलम अन्सारीलाई नियुक्त गरेको छ । काउन्सिलर नियुक्त गरेसँगै परिषदले छिट्टै साखा कार्यालय स्थापना गरेर सुदूरपश्चिम प्रदेशमा स्वास्थ्य अनुसन्धानका गतिविधि अगाडि बढाइने परिषदका कार्यकारी सदस्य सचिव डा.प्रमोद जोशीले जानकारी दिए ।
स्वास्थ्यका क्षेत्रमा विभिन्न अनुसन्धान गर्ने र गराउने जिम्मेवारी पाएको परिषदले देशका सात वटै प्रदेशमा स्वास्थ्य अनुसन्धान परिषद्का साखा विस्तार गर्न क्रममा सुदूरपश्चिम प्रदेशमा साखा विस्तार गरेको हो । विसं २०४७ सालमा स्थापना भएको स्वास्थ्य अनुसन्धान परिषदले स्वास्थ्य सम्बन्धी अध्ययन अनुसन्धान गर्ने र गराउनुका साथै अनुसन्धान सम्बन्धी नीति तर्जुमा गर्ने र अनुसन्धानका प्राथमिकताका क्षेत्र तोक्ने काम गर्छ । परिषद्का सदस्य सचिव डा. जोशीका अनुसार संविधानको मर्म अनुरुप संघीय, प्रादेशिक र स्थानिय सरकारसँग समुन्वय, सहजीकरण र सहकार्य गर्दै स्वास्थ्य अनुसन्धान प्रणालीलाई संघिय संरचना अनुरुप विकास र विस्तार गर्न सुदूरपश्चिममा साखा विस्तार गरिएको हो ।
स्वास्थ्य अनुसन्धानका विषयमा सुदूरपश्चिम सरकारसँग पनि सकारात्मक कुराकानी भइरहेको डा. जोशीले बताए । सुदूरपश्चिम सरकार सामाजिक विकास मन्त्रालयले पनि बजेट नै विनियोजन गरेर स्वास्थ्य अनुसन्धानका क्षेत्रका काम गर्ने योजना बनाएको र त्यसलाई सहयोग पुग्ने गरि परिषद सहकार्य गर्दै अगाडि बढ्ने जोशीले जानकारी दिए । सुदूरपश्चिम प्रदेशमा स्वास्थ्य अनुसन्धान परिषदको साखा विस्तार नभएकाले त्यहाँ स्वास्थ्य अनुसन्धानका विषय अगाडि बढ्न सकेका छैनन् । साखा विस्तार भएपछि आवश्यकता र औचित्यताका आधारमा सुदूरपश्चिम प्रदेशमा स्वास्थ्य अनुसन्धानका गतिविधि अगाडि बढ्ने नव नियुक्त काउन्सिलर डा.अन्सारीले बताए । डा.अन्सारी नेपाल चिकित्सक संघका सुदूरपश्चिम प्रदेश सचिव हुन । उनी निसर्ग हस्पिटलका मेडिकल डाइरेक्टर हुन् ।