डा.पौडेल पनि पुगे अदालतको शरणमा

हेल्थ टुडे

काठमाडौं : सर्वोच्च अदालतले स्वास्थ्य सेवा विभागका महानिर्देशक डा. राजेन्द्र पन्तलाई सरुवा गर्ने स्वास्थ्य मन्त्री दीपक बोहोराको निर्णय कार्यन्वयन नगर्न अन्तरिक आदेश दिएपछि उक्त आदेश रोक्न नव नियुक्त स्वास्थ्य सेवा विभागका महानिर्देशक डा. तारानाथ पौडेल पनि अदालत गएका छन् । महानिर्देशक डा. पन्तलाई मन्त्रालय सरुवा गरेर मन्त्री बोहोराले डा. पौडेललाई पुष २९ गते विभागको निमित्त महानिर्देशक नियुक्त गरेका थिए । डा. पौडेलले माघ २ गतेदेखि महानिर्देशकको जिम्मेवारी सम्हालेका थिए । मन्त्री बोहोराको निर्णय कानून सम्मत नभएको भन्दै डा. पन्त पुनर्वहालीको माग गर्दै सर्वोच्च गएका थिए । सर्वोच्चले माघ १९ गते डा. पन्तका पक्षमा अन्तरिम आदेश जारी गरेको थियो । अदालतले डा.पन्तका पक्षमा भएको आदेश बदर हुनु पर्ने माग गर्दै त्यसको एक हप्तापछि डा. पौडेल पनि अदालत गएका हुन । डा. पौडेलको रिटमाथि आउदो आइतबार बहस हुने सर्वोच्च अदालत स्रोतले जानकारी दिएको छ । आफूलाई अन्याय भएकोले अदालतको शरणमा गएको डा. पौडेलले बताए । सर्वोच्चले डा. पन्तका पक्षमा अन्तरिक आदेश दिएको १० दिन बित्दा समेत उनको पुनर्वहाली हुन सकेको छैन । डा. पौडेल नै आइतबारसम्म विभागको महानिर्देशकको जिम्मेवारी निर्वाह गरिरहेका छन् । नियुक्ती, सरुवा र बढुवामा सधै विवादका आइरहने मन्त्री बोहोराको निर्णयका कारण स्वास्थ्य मन्त्रालयका दर्जनौ चिकित्सक मारमा परेका छन् । मोटो रकम हात पारेर विवादास्पद् एवं अंगिकृत डा. पुष्पा चौधरीलाई  सचिव नियुक्त गरेपछि मन्त्रालयमा भाडभैलो मच्चिन थालेको छ ।