सात महिनापछि न्याम्सले पायो उपकुलपतिसहित पदाधिकारी , उपकुलपतिमा प्राडा डीएन साह नियुक्त

हेल्थ टुडे,

काठमाडौँ, १ चैत : चिकित्सा विज्ञान राष्ट्रिय प्रतिष्ठान (न्याम्स) ले सात महिनापछि उपकुलपतिसहित पदाधिकारी पाएको छ । स्वास्थ्य तथा जनसंख्या मन्त्रालय सहित उपप्रधानमन्त्रीको जिम्मेवारी सम्हालिरहेको मधेशी जनअधिकार फोरमका अध्यक्ष उपेन्द्र यादव र प्रधानमन्त्री केपी ओलीबिच भागबण्डा नमिल्दा सात महिनासम्म नयाँ पदाधिकारी नियुक्त हुन सकेका थिएनन । बिहीबार भागबण्डा मिलेपछि शुक्रबार उपकुलपति सबै पदाधिकारी नियुक्त गरिएको हो । न्याम्सको उपकुलपतिमा प्राडा डीएन साह नियुक्त भएका छन् । उनलाई शुक्रबार राती  बालुवाटारमा भएको कार्यक्रममा न्याम्सका कुलपतिसमेत रहेका प्रधानमन्त्री ओलीले साहलाई उपकुलपतिमा नियुक्त गरेका हुन् । त्यस लगत्तै सहकुलपति समेत रहेका उपप्रधान एवं स्वास्थ्य मन्त्री उपेन्द्र यादवले प्राडा साहलाई उपकुलपतिको सपथग्रहण गराएका थिए । उपकुलपतिको सिफारिसमा न्याम्सका बाँकी पदाधिकारीहरुको समेत नियुक्ती भएको छ । न्याम्सको रेक्टरमा प्राडा सुवोध अधिकारी, रजिष्टारमा प्रा प्रमिला देवान र डीनमा प्राडा पिउस दाहाल रहेका छन् ।

यस्तै बीर अस्पतालको निर्देशकमा डा केदार सेन्चुरी नियुक्त भएका छन । सबै पदाधिकारीहरुलाई कुलपतिको उपस्थितिमा सहकुलपति यादवले सपथ गराएका छन् । सरकारले रिक्त उपकुलपतिको रिफारिस गर्न स्वास्थ्य मन्त्री यादवको अध्यक्षतामा बनाएको समितिले असोजको पहिलो हप्ता नै नियुक्तीमा लागि ३ जना वरिष्ठ चिकित्सकहरुको नाम सिफारिस गरेको थियो । उपकुलपति नियुक्त भएका प्रा.डा. शाह, वीर अस्पतालका नाक, कान, घाटी विशेषज्ञ डा. ढुण्डीराज शर्मा र कान्ति बाल अस्पतालका वरिष्ठ बालरोग विज्ञ डा. अजित राइमाझीको नाम सिफारिस गरिएको थियो ।