डा.पन्तको सरुवा गर्ने निर्णय रोक्न सर्वोच्चको अन्तरिम आदेश

हेल्थ टुडे,

काठमाडौं, १८ माघ : सर्वोच्च अदालतले स्वास्थ्य सेवा विभागका महानिर्देशक डा. राजेन्द्र पन्तलाई हटाएर मन्त्रालय सरुवा गर्ने स्वास्थ्य मन्त्री दीपक बोहोराका निर्णय कार्यन्वयन नगर्न अन्तरिम आदेश जारी गरेको छ । सर्वोच्चका न्यायाधीश ओमप्रकाश मिश्रको एकल इजलासले  कार्यकाल समाप्त नभई डा. पन्तलाई महानिर्देशकबाट हटाएर मन्त्रालय सरुवा गर्ने निर्णय कानून सम्मत नभएको भन्दै उक्त निर्णय कार्यान्वयन नगर्न आदेश दिएको हो । आफूलाई महानिर्देशकबाट हटाएपछि डा.पन्तले माघ १७ गते सर्वोच्चमा रिट हालेका थिए । त्यसैगरि सर्वोच्चले डा. पन्तलाई सरुवा गर्नुको कारण लिखित रुपमा १५ दिनभित्र पेश गर्न समेत सर्वोच्चले स्वास्थ्य मन्त्री र स्वास्थ्य मन्त्रालयको नाममा आदेश जारी गरेको छ ।

स्वास्थ्य मन्त्री बोहोराले यो भन्दा पहिले पनि आर्थिक चलखेलकै आधारमा अख्तियारले कारवाही गर्न पत्र काटेकी डा. पुष्पा चौधरीलाई मन्त्रालयको सचिवमा नियुक्त गरेका थिए । डा.पन्त मन्त्रीस्तरीय निर्णयबाट २०७३ माघ ७ मा विभागको निमित्त महानिर्देशकमा भएका थिए । उनलाई तत्कालिन स्वास्थ्य मन्त्री गगन थापाले महानिर्देशक बनाएका थिए । मन्त्री बोहोराले पुष २८ गते डा. पन्तलाई हटाएर पश्चिमाञ्चल स्वास्थ्य निर्देशनालयका पूर्व निर्देशक डा. तारानाथ पौडेललाई स्वास्थ्य सेवा विभागको महानिर्देशक बनाएका थिए । स्वास्थ्य सेवा ऐन अनुसार १२ औं तहकोलाई महानिर्देशक बनाउनु पर्नेमा स्वास्थ्य मन्त्रीहरुले आफ्नो स्वार्थ अनुसार त्यसो नगरि ११ औं तहकोलाई निमित्त महानिर्देशक बनाइने गरेका छन् ।   सर्बोच्चले न्याय दिएको प्रतिकृया दिदै डा. पन्तले कानूनी सल्लाह अनुसार काममा फर्कने बताएका छन् ।