दोश्रो मेडिकल टुरिजम एशिया समिट २०१९ सम्पन्न

हेल्थ टुडे,
काठमाडौं, १३ पुस : दोश्रो मेडिकल टुरिजम एशिया समिट २०१९ सम्पन्न भएको छ । शुक्रबारदेखि राजधानीको याक एण्ड यति होटेल दरवारमार्गमा सुरु भएको समिटको उद्घाटन नेपाल मेडिकसिटी हस्पिटलका अध्यक्ष उपेन्द्र महतोले गरेका थिए भने दोश्रो दिन स्वास्थ्य तथा जनसंख्या मन्त्री भानुभक्त ढकालले अवलोकन गरेका थिए । एक्स्प्लोर प्रोडक्टिभ चेम्बर अफ कमर्स र नेपाल मिडिकल टुरिजम अर्गनाइजेसनको संयुक्त आयोजनामा भएको समिटमा स्वदेशी र विदेशी विज्ञहरुले २२ वटा विषयमा अनुसन्धानमुलक कार्यपत्र प्रस्तुत गरेका थिए । उद्घाटन कार्यक्रममा बोल्दै महतोले नेपालको स्वास्थ्य सेवाको विकास प्रतिस्पर्धाले नभएर सहकार्य र सुमन्वयले मात्र संभव हुने भएकाले सहकार्यमा जोड दिनु पर्ने बताएका थिए । स्वदेशी र विदशी स्वास्थ्य सेवा प्रदायकहरुलाई एक ठाउँमा ल्याएर सहकार्यको सुरुवात हुनु समिटको सफलता भएकोमा महतोले जोड दिएका थिए । नेपाल मेडिकल टुरिजम अर्गनाइजेसनका अध्यक्ष कृष्ण पाण्डेले नेपालमा स्वास्थ्य पर्यटनका प्रसस्त संभावना भएको औल्याउदै उनले यी अवसरहरुको खोजी गर्न र स्वास्थ्य पर्यटनको विकास गर्न समिट आयोजना गरिएको बताए । नेपाल मेडिकल टुरिजम अर्गनाइजेसनका प्रवन्ध निर्देशक अर्जुन चन्दले समिट सफल भएकोमा खुशी व्यक्त गर्दै भविश्यमा पनि यसले निरन्तरता पाउने बताए । नेपाल सरकारले मनाउन लागिरहेको नेपाल भ्रमण वर्ष २०२० लाई समिटले सहयोग पुग्ने चन्दको दावी छ । समिटमा भाग लिन भारत लगायत विभिन्न देशका स्वास्थ्य सेवा प्रदायक, विशेषज्ञ, चिकित्सक र अस्पतालका अधिकारी गरि दुई हजार भन्दा बढीले सहभागिता जनाएका थिए ।