धुम्रपानका कारण नेपालमा बर्षिनी २७ हजारको मृत्यु ,सूर्तिजन्य पदार्थको सेवन गर्नेहरुमा कोभिड १९ को संक्रमण गम्भिर

हेल्थ टुडे,
काठमाडौं, १८ जेठ : नेपालमा धुम्रपान सेवनका कारण बर्षेनी २७ हजारको ज्यान जाने गरेको पाइएको छ । नेपाल स्वास्थ्य अनुसन्धान परिषद्को अध्ययन अनुसार धुम्रपान सेवनकै कारण २७ हजार नेपालील अकालमा ज्यान गुमाइरहेका छन् । नेपालमा ३ जनामध्ये एक जना धुम्रपानका अम्मली रहेको परिषद्को अध्ययनमा उल्लेख छ । विश्व स्वास्थ्य संगठनका अनुसार विश्व भरि ८० लाख मानिसको मृत्यु धुम्रपान र सुर्तिजन्य पदार्थ सेवनका कारणले हुने गरेको छ । त्यसमध्ये ७० लाख प्रत्यक्ष सेवनकर्ता हुन भने १० लाख भने अममलीसँगै बस्ने छन । आज मे ३१ विश्व धुम्रपान रहित दिवस । नेपाल लगायत विश्व भरि नै यो दिवस मनाइदै छ । यो वर्ष धुम्रपान दिवसको नारा ‘ सूर्तिजन्य उद्योगहरुले गर्ने छलकपटपूर्ण प्रवर्धनबाट युवाहरुलाई बचाऔ र उनीहरुलाई धुम्रपान तथा निकोटिनबाट हुने असरहरुको रोकथाम गरौ ’ भन्ने रहेको छ ।
विश्व स्वास्थ्य संगठनको प्रतिवेदन अनुसार सूर्तिजन्य पदार्थको सेवन गर्नेहरुमा कोभिड १९ को संक्रमण गम्भिर देखिएको छ । सूर्तिजन्य पदार्थको सेवन गर्नेहरुको फोक्सोमा पहिले नै क्षति भइसकेको हुने हुदा कोभिड १९ ले उनीहरुको फोक्सोलाई अझै बढी असर पुर्याउने दावी विश्व स्वास्थ्य संगठनको छ । धुम्रपान सेवन नसर्ने रोगहरु क्यान्सर, मुटुरोग, दम, खोकी, मधुमेहको कारण रहेको विज्ञहरु बताउछन । फोक्सो क्यान्सर रोग विज्ञ डा. अम्बुज कर्णका अनुसार क्यान्सर हुने प्रमुख कारण मध्ये धुम्रपान हो । त्यसमा पनि फोक्सोको क्यान्सरको ८० प्रतिसत कारण धुम्रपान र सूर्तिजन्य पदार्थ सेवन रहेको उनको उनको दावी छ । सरकारले सूर्तिजन्य पदार्थ नियन्त्रणका लागि कानून ल्याएको धेरै वर्ष भइसकेपनि त्यसको कार्यन्वयन हुन सकेको छैन । सार्वजनिक स्थलमा धुम्रपान गर्न नपाइने कानूनी व्यवस्था भए पनि व्यवहारमा लागु सकिरहेको छैन । सूर्तिजन्य पदार्थको बट्टामा ७५ प्रतिसत चित्र घातक रोगहरुको राख्ने प्रावधान लागु भएपनि सरकारले ९० प्रतिसत राख्ने कार्यन्वयन हुन सकिरहेको छैन । त्यसैगरि सरकारले कुनै पनि सञ्चारमाध्यममा सूर्तिजन्य पदार्थको विज्ञापन गर्न निषेध गरेको छ । तर विभिन्न बहानामा सूर्ति उद्योगहरुले वालबालिका र युवायुवतीलाई प्रलोभन दिएर अप्रत्यक्ष विज्ञापन गर्ने गरेका छन । यस्तै किसिममा प्रलोभनबाट युवा पुस्तालाई बचाउन सरकारले बिशेष अभियान चाल्ने स्वास्थ्य तथा जनसंख्या मन्त्री भानुभक्त ढकालले बताएका छन । विश्व धुम्रपान रहित दिवसको अवसरमा मन्त्री ढकालले शुभकामना दिदै धुम्रपानको लतमा नफस्न र यसको प्रभावबाट हुने मृत्युलाई न्यून गर्न सबैले आआफ्नो ठाउबाट योगदान दिन आग्रह गरेका छन ।