आँखाको हेरचाह सम्बन्धी बिषयमा विद्यावारिधी गरेका डा. मिश्र सम्मानित

हेल्थ टुडे,

काठमाडौं, २० असोज :  नेपाल नेत्र ज्योति संघका कार्यकारी निर्देशक डा. शैलेसकुमार मिश्र सम्मानित भएका छन् । ‘सोसल मार्केटिङ इन आई केयर सर्भिसेस् ’ बिषयमा विद्यावारिधी गरेका मिश्रलाई बुधबार राजधानीमा सम्मान गरिएको हो ।

विश्व दृष्टि दिवसको शुभारम्भको अवसरमा नेपाल नेत्र ज्योति संघले आयोजना गरेको कार्यक्रममा नेपाल नेत्र ज्योति संघका पूर्व अध्यक्ष प्रा. डा. रामप्रसाद पोखरेलले डा. मिश्रलाई दोसल्ला ओढाएर सम्मान गरेका हुन । उक्त अवसरमा नेपाल नेत्र ज्योति संघका अध्यक्ष प्रा. डा.चेतराज पन्तले डा. मिश्रलाई फुलको गुच्छा प्रदान गरेर सम्मान गरेका थिए ।

कार्यक्रममा संघका अध्यक्ष डा. पन्तले नेत्र ज्योति संघले आँखा उपचारका साथै यस क्षेत्रका लागि दक्ष जनशक्ति उत्पादनमा पनि उत्तिकै सक्रिय भएर लागिरहेको बताउदै त्यसको गतिलो उदाहरण डा. मिश्र भएको बताए । डा. मिश्रले आर्जन गरेको ज्ञानबाट संघ परिवार र सेवाग्राही लाभान्विन हुने विश्वास डा. पन्तले व्यक्त गरे । कार्यक्रममा आँखा उपचारका उल्लेखनिय सेवा गरे वाफत बुद्घिप्रसाद शर्मालाई पनि सम्मान गरियो ।