शहीद धर्मभक्त प्रत्यारोपण केन्द्रमा डा.पुकारको नेतृत्वमा १२०० को मिर्गौला प्रत्यारोपण

हेल्थ टुडे,
भक्तपुर, १८ माघ : शहीद धर्मभक्त राष्ट्रिय प्रत्यारोपण केन्द्र भक्तपुरले स्थापनाको ११ वर्षमा १२०० जनाको मिर्गौला प्रत्यारोपण गरेको छ । विसं २०६८ फागुनमा स्थापना भएको केन्द्रले त्यसको एक वर्षपछि विसं २०६९ माघ ६ गतेदेखि मिर्गौला प्रत्यारोपण सुरु गरेको थियो । यसैगरि नेपालमा पहिलो पटक कलेजो प्रत्यारोपण गरेको केन्द्रले अहिलेसम्म १८ जनाको सफल कलेजो प्रत्यारोपण गरेको छ ।
शहीद धर्मभक्त राष्ट्रिय प्रत्यारोपण केन्दका निर्देशक एवं प्रत्यारोपण सर्जन डा. पुकारचन्द्र श्रेष्ठ नेतृत्वको टीमले दक्षिण कोरियाका शल्यचिकित्सक डा. डेभिड क्वानको सहयोगमा विसं २०७३ मंसिर २२ गते नेपालमा पहिलो पटक कलेजो प्रत्यारोपण गरेको थियो । यो नै नेपालमा गरिएको पहिलो कलेजो प्रत्यारोपण थियो । बिगत २ महिनाको अवधिमा मात्र केन्द्रले ९ वटा कलेजो प्रत्यारोपण गरेको र आउदो हप्ता २ जनाको प्रत्यारोपण गर्ने तयारी गरेको केन्द्रका निर्देशक डा. श्रेष्ठले जानकारी दिए । सिमित साधन र श्रोतका भरमा पनि एउँटा केन्द्रले ११ वर्षमा १२०० जनाको मिर्गौला प्रत्यारोपण गर्न सक्नु चानचुने कुरा नभएको पुर्व स्वास्थ्य सचिव डा.प्रविण मिश्रले बताए । डा. मिश्रका अनुसार देशलाई मिर्गौला प्रत्यारोपण र कलेजो प्रत्यारोपणमा आत्मनिर्भर बनाउने अभियानका केन्द्र र विषेश गरि डा. पुकारको ठूलो योगदान रहेको छ ।
केन्द्रले विसं २०७४ बैसाख २८ मा देशमै पहिलो पटक मस्तिष्क मृत्यु भएको व्यक्तिबाट मिर्गौला प्राप्त गरि २ जनामा प्रत्यारोपण गरेको थियो । प्रत्यारोपणका अलावा केन्द्रले डायलासिस सेवा, मुटुरोग सेवा सहितका सेवा उपलब्ध गराउदै आइरहेको यो केन्द्रलाई भौतिक संरचनाको अभाव रहेकोले नेपाल सरकारले अस्पताल निर्माणका लागि भक्तपुरमा जग्गा उपलब्ध गराउने निर्णय गरिसकेको छ । सरकारले एक वर्ष पुरा गरेको अवसरका प्रधानमन्त्री पुष्पकमल दाहालले गरेको केही दिन पहिले सम्बोधनमा केन्द्रलाई ५०० शैयाको बनाएर सेवा विस्तार गर्ने उल्लेख गरिएको छ ।