डा. पुकारचन्द्र श्रेष्ठलाई राष्ट्र सेवा सम्मान

हेल्थ टुडे,
काठमाडौं, ५ असोज : शहीद धर्मभक्त राष्ट्रिय प्रत्यारोपण केन्द्र भक्तपुरका कार्यकारी निर्देशक एवं वरिष्ठ अंग प्रत्यारोपण सर्जन डा. पुकारचन्द्र श्रेष्ठ सम्मानित भएका छन् । रिलायन्स एजुकेसन नेटवर्कले शुक्रबार राजधानीमा आयोजना गरेको विशेष कार्यक्रममा डा.पुकारलाई नगद सहित राष्ट्र सेवा सम्मानबाट सम्मानित गरेको हो । मिर्गौला र कलेजो सहित मानव अंग प्रत्यारोपण जस्तो जटिल र खर्चिलो शल्यचिकित्सा सेवालाई स्वदेशमै सर्वसुलभ उपचार संभव बनाएर हजारौ नेपालीको जीवन बचाउन उल्लेखनीय भूमिका खेलेको स्मरण गर्दै डा.पुकारलाई सम्मान गरिएको नेटवर्कका अध्यक्ष रविन्द्रजंग थापाले बताए । नेपालमा पहिलो पटक कलेजो प्रत्यारोपण सेवा सुरुवात गर्ने देखि नेपालमा सबैभन्दा बढी मिर्गौला प्रत्यारोपण गर्ने श्रेय डा. पुकारलाई जान्छ । डा. पुकार कार्यकारी निर्देशक रहेको शहीद धर्मभक्त प्रत्यारोपण केन्द्रले नेपालमा सबै भन्दा बढी १३ सय जनाको सफल मिर्गौला प्रत्यारोपण सम्पन्न गरिसकेको छ । डा. पुकार नेपाल सरकारबाट उत्कृष्ठ चिकित्सकको रुपमा समेत सम्मानित भइसकेका छन् ।