१०२ वर्षिय डा.दाश सहित पाँच वरिष्ठ चिकित्सकलाई ‘लिजेन्ट इन मेडिसिन’ सम्मान

हेल्थ टुडे,
कठमाडौं, २० फागुन : नेपालको चिकित्सा क्षेत्रमा अमूल्य योगदान गरेका पाँच जना वरिष्ठ चिकित्सकहरुलाई लिजेन्ट इन मेडिसिन सम्मान प्रदान गरिएको छ । राष्ट्रपति रामचन्द्र पौडेलले नेपाल चिकित्सक संघको ७५ औं स्थापना दिवसको अवसरमा मंगलबार राजधानीमा आयोजना गरिएको विशेष कार्यक्रममा १०२ वर्षिय डा. गौरीशंकर लाल दाश सहित पाँच जना वरिष्ठ चिकित्सकलाई सम्मान गरेका हुन ।
सम्मानित हुने चिकित्सकहरुमा डा. मृगेन्द्रराज पाण्डे, डा. दिनेशराज गंगोल, डा. डम्बरबहादुर कार्की र डा. सरस्वती पाध्येय छन् । कार्यक्रमलाई सम्बोधन गर्दै राष्ट्रपति पौडेलले नेपाली चिकित्सक पलायन रोक्नका लागि सरकारले पहल गर्नु पर्ने बताए । आम नागरिकको स्वास्थ्यमा सहज प्राप्त गर्ने वातावरण बनाउनु पर्ने अहिलेको आवश्यकता रहेको बताउदै पौडेलले चिकित्सा पेसालाई सम्पूर्ण चिकित्सकहरुले सेवामुखी पेसाको रुपमा लिएर अगाडि बढ्नु पर्नेमा जोड दिए । स्वास्थ्य तथा जनसंख्या मन्त्री प्रदीप पौडेलले निरोगी नेपाल बनाउने अभियान सफल बनाउन सबैभन्दा पहिले चिकित्सकले खुशी भएर काम गर्ने वातावरण बनाउनु आवश्यक रहेको र त्यस कार्यमा वर्तमान सरकार लागि रहेको बताए ।
नेपाल चिकित्सक संघका अध्यक्ष डा. अनिलविक्रम कार्कीले व्यवस्था परिवर्तन भए पनि नेपाली चिकित्सकहरुको अवस्था परिवर्तन हुन नसकेको दावी गर्दै चिकित्सकहरुले भयपुर्ण वातावरणमा काम गर्नु पर्ने अवस्थाको अन्त्य हुनु पर्ने बताए । ‘नेपालको लागि नेपाली चिकित्सक’ भन्ने नाराका साथ चिकित्सक संघले आज आफ्नो स्थापना दिवस मनाएको छ ।
नेपाली चिकित्सकहरुको छाता संगठनको रुपमा नेपाल चिकित्सक संघको स्थापना विसं २००७ साल फागुन २० गते भएको हो ।