औषधि लिमिटेडले छिट्टै २० प्रकारका औषधि उत्पादन गर्ने प्रधानमन्त्रीको दावी

हेल्थ टुडे,
काठमाडौं, १० पुष : प्रधानमन्त्री पुष्पकमल दाहालले औषधिका आत्मनिर्भर हुन सरकारी स्वामित्वमा रहेको नेपाल औषधि लिमिटेडले २० प्रकारका औषधि उत्पादन गर्ने बताएका छन् । सरकारले एक वर्ष पूरा गरेको सन्दर्भमा मंगलबार साझ राष्ट्रका नाममा सम्बोधन गर्दै प्रधानमन्त्री दाहालले सरकारी स्वास्थ्य केन्द्रमा खपत हुने २० प्रकारका अत्यावश्यक औषधि नेपाल औषधि लिमिटेडले उत्पादन गर्ने गरि तयारी भइरहेको बताएका हुन । आवश्यकता भन्दा बढी कर्मचारी, राजनीति र आर्थिक अभावका कारण अहिले नेपाल औषधि लिमिटेडले सिटामोल, जिवनजल लगायतका केही सिमित औषधि मात्र उत्पादन गर्दै आइरहेको छ । प्रधानमन्त्री दाहालले सरकारले स्वास्थ्य तथा जनसंख्या मन्त्रालय मातहतका अस्पतालहरुका ३ हजार ५ सय २३ वटा शैया विपन्नका लागि नि:शुल्क गरिएको बताउदै स्वास्थ्य सेवालाई हरेक नागरिकको पहूचमा पुर्याउनका लागि सरकार लागि परेको दावी गरेका छन् ।