पाँचौ एपी क्याट सम्मेलन आउदो मंसिर १६ देखि १८ सम्म चितवनमा हुने

हेल्थ टुडे,
चितवन, १३ पुस : सुर्तीजन्य पदार्थ र नसर्ने रोगविरुद्घ एसिया प्रशान्त क्षेत्रका नगरहरुको दबाब समूह ‘एशिया प्यासिफिक सिटिज् अलाइन्स फर टोवाको कन्ट्रोल एण्ड नन्कम्युनिकेबल डिजिज’ (एपी क्याट) को पाँचौ सम्मेलन चितवनको भरतपुरमा आउदो २०७७ मंसिर १६ देखि १८ (२०२० डिसेम्बर १ देखि ३ ) सम्म हुने भएको छ । भरतपुर महानगरपालिकाका मेयर रेनु दाहालको अध्यक्षतामा आईतबार महानगरपालिकामा बसेको सरोकारवालाहरुको बैठकले भरतपुर महानगरपालिकाले आयोजना गर्न लागेको एपी क्याटको पाँचौ सम्मेलनको मिति घोषणा गरेर सूर्तिजन्य पदार्थ मुक्त भरतपुर बनाउने अभियानलाई पनि सँगै लैजाने बिषयमा प्रतिवद्धता व्यक्त गरेको छ ।
बैठकमा बोल्दै भरतपुर महानगरपालिकाका मेयर रेनु दाहालले पाँचौ एपी क्याट सम्मेलन भरतपुरले आयोजना गर्नु पाउनु ठूलो अवसर भएको बताउदै यसलाई सफल बनाएर राष्ट्रिय र अन्तर्राष्ट्रिय स्तरमा भरतपुरलाई चिनाउनु पाउनु यसको उपलब्धी हुनेमा जोड दिइन । ‘ क्लिन, ग्रिन र हेल्दी’ भरतपुर भन्ने महानगरपाकिलाले अगाडि सारेको अभियानलाई सम्मेलनले थप उचाईमा पुर्याउने उनले दावी गरिन । सूर्तिजन्य पदार्थ रहित भरतपुर बनाउनमा ठूलो सहयोग हुने यो सम्मेलनलाई सफल बनाउन महानगरपालिकाले कुनै कसर बाकी नराख्ने उनले बताइन । बैठकमा चितवनका प्रमुख जिल्ला अधिकारी नारायणप्रसाद भट्टराईले नतिजा आउने गरि एक वर्षमा महानगरपालिकाले स्वास्थ्यका क्षेत्रमा काम गर्ने कार्यक्रम अगाडि बढाउने बताए । चितवनका प्रहरी प्रमुख दानबहादुर मल्लले सूरक्षाका दृष्टिले सम्मेलन गर्न कुनै समस्या नभएको जानकारी दिए ।
द युनियन एशिया प्रसान्त क्षेत्रका उपमहानिर्देशक डा. तारासिंह बमले वास्तविक जनतालाई स्वस्थ्य बनाउने र स्वास्थ्य सेवा प्रदान गर्ने कार्य स्थानिय निकायले गर्ने भएकाले एशिया प्यासिफिक क्षेत्रका देशका विभिन्न नगरहरुका मेयरहरुबिचको अनभुव आदानप्रदान गर्ने साझा प्रतिबद्धता व्यक्त गरि सूर्तिजन्य पदार्थ रहित नगरहरु बनाउन यो अभियान अगाडि बढेको बताए । देशको विकासका लागि उद्योगहरु आवश्यक रहे पनि जनतालाई रोगी र मृत्युको मुखमा पुर््याउने धूमपान र मध्यपनका उद्योग बन्द हुनु पर्नेमा डा. बलमे जोड दिए । सम्मेलन हुनु भन्दा पहिले नै सुर्तीजन्य पदार्थ मुक्त भरतपुर बनाउनु पर्नेमा डा. बमको जोड थियो ।
एक्सन नेपालका अध्यक्ष आनन्दबहादुर चन्दले सम्मेलनमा एकसय पचास बिदेशी र दुईसय जति स्वदेशी गरि साडे तिनसयभन्दा बढी मेयर, सांसद, अभियन्ता, र सरकारी तथा गैरसरकारी अधिकारीले भाग लिने भएकाले पूर्व तयारी आवश्यक रहेकोमा जोड दिए । एपी क्याटमा अहिले १२ देशका ४० वटा नगरहरु सदस्य छन् । स्वास्थ्य तथा जनसंख्या मन्त्रालय कानून साखाका उपसचिव पुस्करराज नेपालले सूर्तीजन्य पदार्थ मुक्त भरतपुर बनाउन सकियो भने यो देशकै नमुना महानगर हुने भएकाले यसमा महानगरले चालेको पहलले सार्थकता पाउनु पर्ने बताए । नगरबासी अस्वस्थ भएपछि सुखी नेपाली हुन नसक्ने दावी गर्दै जनता सुखी हुनका लागि महानगरले स्वास्थ्यलाई प्रमुख प्राथमिकतामा राख्नु पर्ने नेपालले बताए ।